«Belli Tilsimat» türkmen kompaniýasy 1-nji aprelden başlap, 1C programmasyny professional derejede özleşdirmek boýunça intensiw okuw sapaklaryny geçirýär. Bu okuw 1C platformasynda buhgalterçilik we programmirleme bilimlerini hem-de başarnyklaryny artdyrmak üçin ajaýyp mümkinçilikleri döredýär.

«1C Buhgalteriýa: amaly peýdalanylyşy» okuwy diňleýjiler üçin buhgalterçilik hasabatyny dolandyrmak babatda täze usullary we maslahatlary özleşdirmekde, programmanyň esasy aýratynlyklaryny öwrenmekde hem-de olary amalyýetde ynamly peýdalanmakda ajaýyp mümkinçilikdir. Okuwyň dowamlylygy – 2 aý, ondan soňra siziň karýeraňyz täzeçe itergi alar.

«1C programmirlemesiniň esaslary we tehniki wezipeleriň çözülişi» okuwy diňleýjilere 1C dilinde programmirlemegiň dünýäsini açar we bu platforma içgin düşünmäge ýardam berer, şeýle hem başga ulgamlardaky maglumatlar, hasabatlar we integrasiýalar bilen işleşmek ukybyny özleşdirmäge mümkinçilik berer. Okuwyň dowamlylygy – 6 aý, ol hersi 3 aý dowam edýän okuwlar görnüşinde geçirilip, hünär mümkinçilikleriňizi artdyrar.

«Belli Tilsimat» kompaniýasynyň ussat hünärmenler topary türkmen bazarynda innowasion tehnologiýalar hem-de sanly çözgütler ulgamyna degişli 300-den gowrak taslamany işläp düzmek we işe girizmek bilen, ykdysadyýetiň dürli pudaklaryndaky kärhanalaryň netijeli iş alyp barmagyna goşant goşdular.

Kompaniýanyň esasy üstünlikleriniň biri hem «Türkmendeňizderýaýollary» agentliginiň deňiz kenarynda ýerleşýän Türkmenbaşy şäherindäki kärhanalarynyň işewürlik amallaryny awtomatlaşdyrmak boýunça taslamasy bolup, ol «1C:ERP Kärhanany dolandyrmak 2» programma üpjünçiliginiň binýadynda amala aşyryldy. Bu taslama Halkara deňiz portuny, «Balkan» gämi gurluşyk we abatlaýyş zawodyny hem-de «Türkmendeňizdeýaýollary» agentliginiň beýleki kärhanalaryny bitewi ulgamda jemläp, ulanyjylaryň birbada 800-sine elýeterliligi üpjün etdi.

ORIENT news