Biz ýakynlaşmagy ugur edinýäris

Halk Maslahatynyň mejlisi tamamlanandan soňra, Türkmenistanyň köp edaralarynda halk häkimýetiniň ýokary wekilçilik edarasynyň ikinji mejlisiniň netijeleri boýunça forumlar, ýygnaklar we tegelek stollar geçirilýär.

Şol sanda Türkmenistanyň Daşary işler ministrliginiň Halkara gatnaşyklary institutynda, diplomatik ugurdaky häzirki we geljekki hünärmenleriň arasynda konferensiýa geçirildi. Bu ugra ýöriteleşen ýokary okuw mekdebiniň mugallymlary we talyplary, jemgyýetçilik guramalarynyň ýolbaşçylary ýurduň geçen ýoluny jikme-jik seljerip edilen çykyşlary diňlediler, şeýle hem ýurduň ýolbaşçylarynyň aýdan taglymatyna laýyklykda mundan beýläkki ösüş üçin öňde goýlan meseleler aýdyldy.

Syýasy ugurlaryň köpüsine täzeden seredilmegi, söwda gatnaşyklarynyň üýtgemegi we täze ykdysady tolgunyşyk howpy bilen häzirki zaman dünýäsiniň häzirki ýagdaýynda, Türkmenistan ähli gyzyklanýan taraplar bilen ýurduň durmuş-ykdysady ösüşi we halkyň gülläp ösmegi üçin bitaraplyk we özara peýdaly hyzmatdaşlyk ýörelgelerine esaslanýan öz ugruny maksatly durmuşa geçirmegi dowam etdirýär.

Bu esasy ýörelgeler, Türkmenistanyň Konstitusiýasyna we ýurduň hökümeti tarapyndan kabul edilen konseptual resminamalara laýyklykda üýtgemedi we üýtgewsiz galýar. Halkara gatnaşyklary institutyndaky foruma gatnaşyp söz sözlänleriň ählisiniň çykyşlary şu mazmunda boldy.

Mysal üçin, daşary işler ministri Raşid Meredow öz hasabatynda ýurduň mundan beýläkki ösüşi bilen baglanyşykly döwlet we jemgyýetçilik durmuşynyň köp meselelerine ünsi çekdi we şol bir wagtyň özünde Türkmenistanyň Prezidentiniň Daşary işler ministrliginiň öňünde goýan maksadyna aýratyn ähmiýet berdi, emma bu häzirki zaman geo-ykdysady giňişlikde ýöriteleşdirilen işleri alyp barýan beýleki pudaklaryň wezipeleri bilen hem ýakyndan baglanyşyklydyr.

Prezident Serdar Berdimuhamedowyň öňe süren esasy daşary syýasatynyň maksatlary: döwletiň we jemgyýetiň asuda we yzygiderli ösmegi üçin amatly daşarky şertleri döretmek, Bitarap Türkmenistanyň dünýädäki ornuny berkitmek, halkara gatnaşyklary ulgamynda milli bähbitlerini yzygiderli goramakdan ybaratdyr.

Döwlet Baştutanynyň öňde goýlan wezipeleri üstünlikli durmuşa geçirmek üçin dünýäde parahatçylyga we howpsuzlyga ýetmek, daşary ykdysady gatnaşyklary ýola goýmak we ynsanperwerlik, ahlak we adalat ýaly ýokary ideallary halkara derejesinde ornaşdyrmak meselelerine üns bermeli. Şeýle-de bitaraplyk ýörelgelerini bütin dünýäde işjeň wagyz etmek hem wajyp işleriň biridir!

-Türkmenistan beýleki ýurtlar üçin görelde bolmak bilen, bu ýörelgelere eýerip, islendik gapma-garşylygy syýasy we diplomatik ýollar arkaly çözmegi hemişe goldaýar. "Dialog - parahatçylygyň kepili" pelsepesine esaslanýan Türkmenistan, öňüni alyş diplomatiýasynyň gurallarynyň halkara gatnaşyklary ulgamyna ornaşdyrylmagynyň işjeň goldawçysydyr, - diýmek bilen, Daşary işler ministri Raşid Meredow sözüni jemledi.

Adatdan daşary we doly ygtyýarly ilçi, ÝUNESKO-nyň işleri boýunça Türkmenistanyň milli toparynyň jogapkär sekretary Çynar Rüstemowa hem Halk Maslahatynyň mejlisinde kabul edilen wezipeleriň ähmiýeti we Türkmenistanyň halkara guramalary bilen gatnaşygy, esasan hem özüne ýakyn bir ugra ünsi jemläp - Birleşen Milletler Guramasynyň Bilim, ylym we medeniýet boýunça ýöriteleşdirilen düzümi bilen hyzmatdaşlygy barada giňişleýin gürrüň berdi.

Jogapkär sekretar Prezident Serdar Berdimuhamedowyň Halk Maslahatynyň mejlisinde eden çykyşynda ileri tutulýan meseleleriň giň toparyny beýan edendigini belledi. Şeýle-de, döwlet Baştutany bilim ulgamynda ÝUNESKO-nyň işleri boýunça Türkmenistanyň milli toparynyň çäginde BMG-niň bu agentliginiň klublarynyň milli federasiýasyny döretmek başlangyjyny hem-de Bütindünýä tebigy mirasynyň sanawyna ýurdumyzyň çäginde ösýän dermanlyk ösümliklere esaslanýan halk bejeriş usullaryny, Akpatlawuk, Gökpatlawuk ýaly palçyk wulkanlaryny we ş.m. geologiki ýadygärliklerini girizmegi nygtady.

Çynar Rüstemowa, Türkmenistanyň Prezidentiniň Bütindünýä medeni mirasynyň sanawyna Daýahatyn ýaly gadymy kerwensaraýlary we bir wagtlar Beýik küpek ýolunyň esasy söwda nokatlary bolup hyzmat eden Dehistan ýadygärliklerini bu sanawa goşmak üçin işleriň dowam etdirilmeginiň möhümdigini aýtdy.

Hünärmenleriň arasynda beýleki halklaryň arasynda meňzeşligi ýok diýlip ykrar edilen milli tagamymyz bolan dogramanyň, maddy däl medeni mirasyň sanawyna girizilmegine garaşylýar. Şeýle hem hüwdiniň ýerine ýetirilişini we çaganyň sallançagyny bezemek sungatyny bu sanawa goşmak meýilleşdirilýär.

Prezident Serdar Berdimuhamedow türkmen paýtagtyny we Arkadag şäherini ÝUNESKO-nyň döredijilik şäherleri toruna goşmagy, şeýle hem - Türkmenistanyň Ylymlar akademiýasynyň Tehnologiýalar merkezinde ÝUNESKO-nyň “Sanly ylymlar” kafedrasyny döretmegi we Türkmenistanyň ÝUNESKO-nyň bedenterbiýe we sport boýunça Hökümetara komitetine saýlanmagy üçin işleri durmuşa geçirmegi möhüm hasaplady.

...Soňra, Türkmenistanyň Daşary işler ministrliginiň Halkara gatnaşyklary institutynyň rektory Jumamyrat Gurbangeldiýew we kärdeşi - Halkara ynsanperwer ylymlary we ösüş uniwersitetiniň rektory Esen Aýdogdyýew öz çykyşlaryny ýaş hünärmenleri taýýarlamak işindäki pedagogiki meselelere bagyşladylar.

Abraýly ýokary okuw mekdepleriniň ýolbaşçylarynyň hasabatlarynda Türkmenistanyň Prezidentiniň Halk Maslahatynyň mejlisinde eden çykyşynda hem aýratyn üns beren okatmagyň usullaryny kämilleşdirmek Konsepsiýasyny işläp düzmek baradaky wezipesi umumy tema boldy. Bu, çykyş edenleriň belleýşi ýaly, okuw usullarynda milli tejribe bilen halkara bilim standartlarynyň sazlaşykly utgaşmagyna gönükdirilendir.

Çykyş edenler, ýygnananlaryň ünsüni Prezident Serdar Berdimuhamedowyň Halk Maslahatynyň mejlisinde eden çykyşynda, Türkmenistanda ylmy, tehniki, inženerçilik we dolandyryş işgärlerini taýýarlamak, şeýle hem ýurduň ylmy jemgyýetçiliginiň belli öndürijiler bolan - senagat toplumlary, agrosenagat kärhanalary we ş.m. bilen has ýakyn hyzmatdaşlygy saklamak meselesine çekdiler.

Türkmenistanyň Daşary işler ministrliginiň Halkara gatnaşyklary institutynda geçirilen konferensiýanyň dowamynda, bilşimiz ýaly, ýaşlaryň elinde bolan şu günki we geljekde ýurduň ösüşi bilen baglanyşykly beýleki meseleler ara alnyp maslahatlaşyldy. Şeýle-de Türkmen halkynyň Milli Lideri Gurbanguly Berdimuhamedow Halk Maslahatynda eden çykyşynda, ýaşlaryň - halkymyzyň daýanjydygyny belledi!

ORIENT news

Foto: orient.tm