Gazagystanyň paýtagtynda Ýewraziýa ykdysady bileleşigine (ÝYB) agza ýurtlaryň liderleri we iri halkara wekiliýetleriň ýolbaşçylary sebitiň ykdysadyýetine sanly tehnologiýalary giňden ornaşdyrmak meselelerini ara alyp maslahatlaşmak üçin ýygnandylar.

Şu ýyl halkara forumyň esasy mowzugy dünýä derejesindäki sanly bäsdeşlik we emeli aňy ösdürmek strategiýasy boldy. Gazagystanyň Prezidenti Kasym-Žomart Tokaýew gatnaşyjylara ýüzlenmesinde dünýä ykdysadyýetindäki durnuksyzlyk şertlerinde bileleşige agza ýurtlaryň tehnologik ösüş üçin döreýän taryhy mümkinçilikden peýdalanmalydygyny belledi. Onuň sözlerine görä, maglumat tehnologiýalary ulgamyndaky hyzmatdaşlyk ähli gatnaşyjy döwletleriň durnukly ykdysady ösüşiniň binýadyna öwrülmelidir.

Forumyň çäklerinde ýakyn ýyllarda Ýewraziýa bazaryny özgertmäge gönükdirilen uly taslamalar tanyşdyryldy. Olaryň arasynda halkara emeli aň merkeziniň döredilmegi, kuwwatly superkompýuteriň işe girizilmegi we milli sanly platformanyň döredilmegi bar. Mundan başga-da, takmynan 1,5 milliard ABŞ dollary möçberinde maýa goýumlary göz öňünde tutulýan iri “Maglumat merkezleri jülgesini” gurmak meýilleşdirilýär.

Wekiller aýratyn ünsüni ulag-logistika ulgamyna IT çözgütleriniň ornaşdyrylmagyna gönükdirdiler. Sanlylaşdyrma esasy halkara ugurlar boýunça ýük dolanyşygyny optimizirlemäge we harytlaryň eltiliş möhletlerini ep-esli gysgaltmaga mümkinçilik berer. Forumyň netijeleri işewürlik we jemgyýet üçin uly mümkinçilikleri açýar: prosesleriň awtomatlaşdyrylmagy söwdany ýeňilleşdirer, logistika zynjyrlaryny tizleşdirer hem-de sebitdäki sanly hyzmatlary has elýeterli we ygtybarly eder.

ORIENT