Tomusky dynç alyş möwsüminiň öňüsyrasynda «Awaza» syýahatlary üçin onlaýn sargyt etmeklige gyzyklanma artýar
Türkmenistanda ýazky syýahatçylyk möwsümi gyzgalaňly dowam edýär, öňde bolsa tomusky dynç alyş we mekdep dynç alyş günleri garaşýar. Şunuň bilen baglylykda, ýurdumyzyň ýaşaýjylary syýahatlaryny guramak üçin uzak aralykdan peýdalanylýan hyzmatlary has köp saýlap başladylar. «Awaza» milli syýahatçylyk zolagyna gitmegi meýilleşdirýänler üçin e.gov.tm portalynda amatly onlaýn hyzmat elýeterlidir.
Platforma uçar, otly ýa-da awtobus biletlerini öňünden hem-de artykmaç aladasyz resmileşdirmäge mümkinçilik berýär. Hyzmatdan peýdalanmak üçin «Ulag, logistika we gümrük gullugy» bölümine girip, degişli ugruňyzy we ulag görnüşini saýlamak ýeterlikdir.
Sanly görnüş kassalara baryp, nobata durmak zerurlygyny aradan aýyrýar. Biletleriň tölegi «Altyn Asyr» bank kartlarynyň kömegi bilen gije-gündiziň dowamynda kabul edilýär, bu bolsa Hazar deňziniň kenaryndaky tomusky dynç alyşa taýýarlygy mümkin boldugyça çalt we amatly edýär.
