Türkmenistan Ýaponiýada geçiriljek «GREEN×EXPO 2027» halkara bagbançylyk sergisine taýýarlyk görýär
Türkmenistan 2027-nji ýylyň 19-njy martyndan 26-njy sentýabryna çenli Ýaponiýanyň Ýokogama şäherinde geçiriljek dünýä ähmiýetli «GREEN×EXPO 2027» halkara bagbançylyk sergisine gatnaşmak üçin taýýarlyk işlerine başlady. Wise-premýer Nökerguly Atagulyýew tarapyndan hödürlenen, milli ekspozisiýanyň ýokary derejesini üpjün etmegiň meýilnamasy 15-nji maýda, anna güni geçirilen Ministrler Kabinetiniň mejlisinde Prezident Serdar Berdimuhamedow tarapyndan makullanyldy.
«Bagt üçin geljegiň peýzažy» şygary astynda guraljak bu abraýly sergi dünýäniň 80-e golaý ýurduny bir ýere jemlär we çaklamalara görä, oňa 15 milliondan gowrak adam geler. Ýaponiýanyň mirasdüşer şazadasy Akisinonyň howandarlygynda geçiriljek sergi 100 gektar meýdanda ýerleşer. Onda geljegiň ýaşyl tehnologiýalaryny özünde jemleýän “Urban GX” zolagyndan başlap, däp bolan halk senetçiligi ýerlerine çenli bäş sany tematiki giňişligiň konsepsiýasy görkeziler.
Gurak howa şertlerinde gülleýän oazisleri we seýilgäh zolaklaryny döretmekde özboluşly ajaýyp tejribesi bolan Türkmenistan özüniň innowasion landşaft çözgütleri we ählumumy ekoulgama goşýan goşandy bilen dünýä jemgyýetçiligini haýran galdyrmagy maksat edinýär.
Döwlet Baştutany ýurduň halkara ekologiýa platformalaryna goşulyşmagynyň möhümdigini belledi we degişli edaralara Türkmenistanyň pawilýonynyň ýokary derejede guralmagyny üpjün etmegi tabşyrdy.
