«PETRONAS»-yň ýolbaşçylar wekiliýetiniň Aşgabada sapary strategik hyzmatdaşlygyň dowam edýändigini tassyklaýar
Aşgabatda Türkmenistan bilen Malaýziýanyň energetika ägirdi bolan «PETRONAS» kompaniýasynyň köp ýyllyk hyzmatdaşlygyna bagyşlanan dabaraly agşam geçirildi. Hökümetiň wekillerini, diplomatlary we nebitgaz pudagynyň ýolbaşçylaryny bir ýere jemlän bu baýramçylyk diňe bir korporatiw çäre bolman, eýsem, özara hormat goýmagyň we professional derejesindäki sazlaşykly hyzmatdaşlygyň hakyky dabaralanmasyna öwrüldi.
Dabaraly agşama wise-premýer Guwanç Agajanowyň we ýurduň nebit-gaz toplumynyň düzümleriniň ýolbaşçylarynyň, şeýle hem «PETRONAS» kompaniýasynyň ýokary wezipeli adamlarynyň — baş ýerine ýetiriji direktory Tan Şri Tengku Muhammad Taufigiň we özleg we agtaryş, özleşdirme we çykaryş bölümçesiniň baş ýerine ýetiriji direktory Mohd Jukris bin Abdul Wahabyň gatnaşmagy duşuşygyň aýratyn derejesini görkezdi.
Çäräniň joşgunly gurşawyny folklor ansambllarynyň çykyşlary we çagalaryň döredijilik çykyşlary has-da baýlaşdyrdy, tomaşaçylar bolsa çagalar toparynyň çykyşyny ö, el çarpyşmalar bilen garşyladylar.
Çärede «Türkmennebit» döwlet konserniniň we «PETRONAS» kompaniýasynyň wekilleri çykyş edip, hyzmatdaşlygyň otuz ýylynyň dowamynda kompaniýa Hazar deňzindäki ilkinji maýadarlaryň birinden başlap, ýurduň ykdysadyýetine goşan goşandy 11,7 milliard dollar bilen bahalandyrylýan strategik hyzmatdaş derejesine çenli uly ýoly geçdendigini nygtadylar.
«Türkmennebit» döwlet konserniniň wekili Maksat Esenowyň belleýşi ýaly, şu günki günde hyzmatdaşlyk täze derejä çykýar — bu ýerde gürrüň innowasiýalary we ekologiýa taýdan howpsuz çözgütleri ornaşdyrmak barada barýar.
Agşamyň iň möhüm bölegi «adam maýasy» mowzugy boldy. «PETRONAS» diňe bir platformalar we terminallar däl-de, eýsem, ýüzlerçe ykballardyr. 300-den gowrak türkmen talyby eýýäm «PETRONAS» Tehnologiýa uniwersitetinde (UTP) bilim alyp, ýurdumyzyň energetika pudagynda innowasiýalaryň hereketlendiriji güýjüne öwrüldiler.
Kompaniýanyň ýolbaşçylarynyň, şol sanda «PETRONAS» kompaniýalar toparynyň ýolbaşçysy we baş ýerine ýetiriji direktory Tan Şri Tengku Muhammad Taufigiň Aşgabada sapary örän möhüm ädim boldy. Hazar deňziniň türkmen bşleginde täze 19-njy we 20-nji ygtyýarnamaly bloklary özleşdirmek boýunça täjirçilik şertleri hakyndaky Teswirnamanyň gol çekilmegi şunuň subutnamasydyr: 30 ýyl — bu diňe başlangyçdyr.
Bu ädim maýadaryň geljege bolan ynamyny we Türkmenistanyň özara bähbitli dialogy giňeltmäge taýýardygyny görkezýär.
Şeýle hem, wekiller topary ýerli jemgyýete we umumy üstünligiň binýady bolup durýan önümçilik desgalarynyň işgärlerine minnetdarlyk bildirmek üçin Gyýanly şäherçesine baryp görer.
