Ýaşlar üçin amaly biznes sapagy: «Biznesiň skeleti – rollar we paýlar»
Ýakynda S.A. Nyýazow adyndaky Türkmen oba hojalyk uniwersitetinde ýaş telekeçileriň we talyplaryň gatnaşmagynda «Biznesiň skeleti – Rollar we paýlar» atly açyk sapak ýokary derejede geçirildi. Kadyrberdi Nurberdiýew öz tejribesine daýanyp, biznesi gurmakda diňe bir ideýanyň däl, eýsem dogry gurluşyň hem möhüm ähmiýete eýedigini nygtady.
Çäräni Türkmenistanyň Bilim ministrligi, S.A. Nyýazow adyndaky Türkmen oba hojalyk uniwersiteti, TSTP-niň Aşgabat şäher komitetiniň ýanyndaky “Ýaş telekeçiler” merkezi hem-de TMÝG-niň Maglumat, maslahat beriş we meýletinçilik işleri boýunça Merkezi tarapyndan bilelikde guradylar.
Çäräniň dowamynda gatnaşyjylara biznesiň içki arhitekturasy, rollaryň netijeli paýlanyşy we jogapkärçiligiň takyk kesgitlenmeginiň kompaniýanyň ösüşine nähili täsir edýändigi barada gymmatly maglumatlar berildi. Belläp geçilişi ýaly, her bir üstünlikli kompaniýanyň binýady anyk kesgitlenen rollardan, düşnükli jogapkärçilikden we deňagramly paý gurluşyndan ybaratdyr.
Kadyrberdi Nurberdiýew öz çykyşynda biznesde tertip-düzgüniň we dolandyryş ulgamynyň bolmazlygynyň köp halatlarda üstünliksizlige getirýändigini aýratyn nygtady. Şeýle-de ol, dogry gurluşyň döredilmegi bilen islendik ideýanyň durnukly we dolandyrylýan ulgama öwrülip bilýändigini mysallar arkaly düşündirdi. Gatnaşyjylar özlerini gyzyklandyrýan sowallary berip, amaly maslahatlary aldylar. Bu bolsa çäräniň diňe teoriýa bilen çäklenmän, eýsem amaly taýdan hem ähmiýetlidigini görkezdi.
ORIENT
