Pekin awtosalony 2026: rekordlar we elektrik geljegi
Sergä 1,28 million adam bardy, täze modelleriň takmynan 80%-ini bolsa elektromobiller düzdi
Hytaýda dünýä awtoulag senagatynyň iň möhüm wakalarynyň biri tamamlandy — we ol birnäçe rekordy täzeledi. “Auto China 2026” diýlip hem tanalýan 2026-njy ýylyň Pekin halkara awtoulag sergisi ýekşenbe güni ýapyldy we ol Hytaýyň awtoulag pudagynyň geljegine bolan uly ynamy güýçlendirdi. Bu baradaky maglumatlary CCTV+ habar berýär.
24-nji aprelde “Intellektiň geljegi” şygary bilen açylan on günlük sergi göwrümi boýunça dünýä rekordyny goýdy. Iki meýdançada 380 müň inedördül metr meýdany eýelän sergide 1451 awtoulag, şol sanda 181 sany dünýä we Hytaý premýerasy hem-de 71 konsept-awtoulag görkezildi.
Bu ýyl sergä jemi 1 million 280 müň adam baryp gördi, olaryň takmynan 65 müňi daşary ýurtly myhmanlar boldy. Daşary ýurtly myhmanlaryň ünsüni aýratynlykda täze energiýa çeşmelerinde işleýän ulaglar çekdi — Hytaýda olar elektromobiller we gibrid ulaglar diýlip atlandyrylýar.
Hytaýyň AutoLink kompaniýasy bu sergini täze nesil awtoulaglar üçin elektron we elektrik arhitekturasyny tanyşdyrmak üçin ulandy. BYD kompaniýasynyň tiz zarýad sergi stendinde bolsa elektromobil 20%-den 97%-e çenli bary-ýogy 12 minutda zarýad aldy.
Ýatladyp geçsek, 2025-nji ýylda Hytaýda elektromobilleriň içerki önümçiligi we satuwy 16 milliondan geçdi, şol bir wagtyň özünde içerki bazarda täze awtoulag satuwlarynyň 50%-den gowragy elektromobillere degişli boldy.
Günorta Afrikadan gelen bir myhman öz täsirlerini paýlaşyp, öz ýurduna garanyňda bu ýerde elektromobilleriň köp bolmagynyň özüne örän täsir edendigini aýtdy.
Bu ýylky awtosalon awtoulag muşdaklaryny ýönekeý salonly dynç alyş ulaglaryndan başlap, berk pikaplaryň kibernetik stiline we hatda elektrik dikuçarlaryna çenli täze ulag görnüşleri bilen tanyşdyrdy. Bularyň ählisi myhmanlaryň geljekki hereketlilik baradaky düşünjelerini giňeltdi.
Başga bir myhman bolsa aýratynlykda sürüjisiz awtoulaglaryň özüne ýakyn gelýändigini aýtdy, sebäbi olar adamlary sürmekden azat edip biler. Şeýle-de ol uçýan awtoulaglar ýaly has ösen tehnologiýalara garaşýandygyny aýtdy.
Bu ýylky awtosalonda dünýä awtoulag senagaty elektrifikasiýa we akylly özgertmeler ugruna bolan açyk tendensiýany görkezdi. Täze görkezilen modelleriň takmynan 80%-i elektromobillerdir, şol bir wagtyň özünde umumy sanynyň 60%-i hytaý garaşsyz brendlerine degişli boldy.
Serginiň guramaçylarynyň aýtmagyna görä, geljekde serginiň halkara gerimini giňeltmäge has köp üns berler. Şeýle-de awtoulag pudagynyň ähli zynjyry boýunça, şol sanda satuwdan soňky hyzmat ulgamynda brendi ösdürmek we onuň gymmatyny ýokarlandyrmak ugrunda çäreler görler.
Hytaýyň halkara söwda boýunça goldaw beriji geňeşiniň awtoulag bölüminiň baş müdiriniň orunbasary Wan Szýunsin Hytaýyň awtoulag senagatynyň daşary bazarlara çykmak prosesinde taýýar awtoulag önümçiligi bilen ýokary hilli komponentleriň önümçiliginiň sazlaşykly birleşmegine ýetjekdigini belledi.
Şeýle-de ol Pekin halkara awtosergisi ýaly meýdançalaryň ýerli we daşary ýurt tehnologiýalarynyň, brendleriniň hem-de medeniýetleriniň alyş-çalşygyny ösdürmäge ýardam berjekdigini, şeýlelik bilen hytaý awtoulaglarynyň dünýä bazarlaryna has netijeli çykmagyna mümkinçilik döretjekdigini aýtdy.
