Seýşeller Respublikasynyň DIM-niň ýolbaşçysy sebite saparynyň dowamynda Aşgabada geldi
29-njy aprelde Prezident Serdar Berdimuhamedow Seýşeller Respublikasynyň Daşary işler we diaspora ministri Barri Fory kabul etdi. Bu sapar ikitaraplaýyn gatnaşyklaryň taryhynda Seýşeller Respublikasynyň daşary syýasat edarasynyň ýolbaşçysynyň biziň ýurdumyza amala aşyran ilkinji resmi sapary boldy we bu uzak möhletleýin hyzmatdaşlygyň işjeň tapgyryna geçilýändigini aňladýar.
Döwlet Baştutany bilen geçirilen söhbetdeşligiň dowamynda Barri For Seýşeller Respublikasynyň Prezidenti Patrik Erminiň iberen mähirli salamyny ýetirdi we öz ýurdunyň okgunly ösýän Türkmenistanyň tejribesine uly gyzyklanma bildirýändigini nygtady.
Prezident Serdar Berdimuhamedow Türkmenistanyň eksport mümkinçilikleriniň ikitaraplaýyn gatnaşyklaryň ödürilmegi üçin esas bolup biljek anyk ugurlaryny kesgitledi. Olaryň hatarynda — ýangyç-energetika toplumy, himiýa we dokma senagaty, şeýle hem oba hojalygy bar.
Ynsanperwer ulgamyna aýratyn üns berildi: dünýäniň syýahatçylyk merkezi bolan Seýşeller Respublikasy we öz syýahatçylyk düzümini ösdürýän Türkmenistan tejribe alyşmakda hem-de özara syýahatçylyk akymlaryny kämilleşdirmekde uly geljegi görýärler.
Hyzmatdaşlyk gurallarynyň jikme-jik maslahatlaşylmagy daşary syýasat edarasynyň binasynda Türkmenistanyň daşary işler ministri Raşid Meredow bilen geçirilen duşuşykda dowam etdirildi. Türkmen tarapy Seýşeller Respublikasyna ählumumy parahatçylygy we howpsuzlygy berkitmek üçin döredilen halkara meýdança bolan Bitaraplygyň dostlary toparyna goşulmaga çagyrdy.
Diplomatlar häzirki bar bolan şertnamalaýyn-hukuk binýadyny giňeltmegiň zerurdygy baradaky pikirlerini bellediler. Işewürlik gatnaşyklaryny «janlandyrmak» üçin birnäçe işewürler forumy we sergini geçirmek meýilleşdirilýär. Medeni ulgamda hem uly meýilnamalar beýan edildi: taraplar Aşgabatda we Wiktoriýada Medeniýet günlerini geçirmek mümkinçiligini maslahatlaşýarlar, bu bolsa geografik taýdan uzaklyga garamazdan, iki ýurduň halklarynyň biri-birine has ýakynlaşmagyna mümkinçilik berer.
Bu sapar Türkmenistanyň hemişelik Bitaraplyk derejesiniň dünýäniň iň dürli sebitleri bilen dialogy ýola goýmak üçin netijeli köpri bolup galýandygyny hem-de alysdaky adadaky ýurtlary geljegi uly hyzmatdaşlara öwürýändigini aýdyň tassyklaýar.
Geçen ýylyň noýabr aýynda Seýşeller Respublikasynyň daşary syýasat edarasyna ýolbaşçylyk edip başlan Barri Forynyň häzirki sapary onuň sebit boýunça diplomatik saparynyň bir bölegidir. Türkmenistan bilen Seýşeller Respublikasynyň arasynda diplomatik gatnaşyklar 2024-nji ýylyň awgust aýynda ýola goýuldy.
