Türkmenistanyň wekiliýeti Doha şäherinde Bütindünýä maýa goýum forumyna gatnaşýar
25-nji oktýabrda Katar Döwletiniň Doha şäherinde «Geljege maýa goýum» ady bilen 9-njy Bütindünýä maýa goýum forumynyň açylyş dabarasy geçirildi. Oňa Kataryň Premýer-ministri we Daşary işler ministri, daşary ýurtlaryň hökümet ýolbaşçylary, ministrler we beýleki ýokary derejeli wekiller, halkara guramalarynyň ýolbaşçylary hem-de hususy pudagyň wekilleri gatnaşdylar.
Bu dabaraly çärä türkmen tarapyndan Türkmenistanyň Söwda we daşary ykdysady aragatnaşyklar ministri N.Agahanowyň ýolbaşçylygyndaky wekiliýet gatnaşdy.
Şeýle hem günüň ikinji ýarymynda forumyň çäginde ministrler derejesinde geçirilen maýa goýumlar baradaky ýokary derejeli sessiýa türkmen wekiliýeti gatnaşdy we ol ýerde ministr N. Agahanow çykyş etdi.
Onuň çykyşynda, Türkmenistanyň ykdysady ösüşi, ýurdumyzyň maýa goýum syýasatynyň ileri tutulýan ugurlary, hususan-da, nebit-gaz, energetika, oba hojalygy we senagat pudaklary barada bellenilip geçildi. Mundan başgada Türkmenistanyň Prezidentiniň ýolbaşçylygynda ýurdumyzyň ulag we üstaşyr mümkinçiliklerini ösdürmäge aýratyn üns berilýändigini barada nygtaldy.
Agzalan Forum Katar Döwletiniň we Birleşen Milletler Guramasynyň Söwda we ösüş boýunça konferensiýasynyň bilelikde guramagynda 25–27-nji oktýabr aralygynda öz işini dowam eder.
ORIENT
