"Rossotrudniçestwo" agentliginiň ýolbaşçysy wezipesine Igor Çaýka bellenildi
Russiýa Federasiýasynyň Prezidentiniň permany bilen Garaşsyz Döwletleriň Arkalaşygy, daşary ýurtlarda ýaşaýan watandaşlar we halkara ynsanperwer hyzmatdaşlyk boýunça Federal agentligiň (Rossotrudniçestwo) täze ýolbaşçysy wezipesine Igor Çaýka bellenildi. Bu wezipede ol Ýewgeniý Primakowy çalyşdy.
Igor Çaýkanyň bellenilmegi onuň agentlikdäki köp ýyllyk işiniň dowamly netijesi boldy. Ol 2021-nji ýyldan bäri "Rossotrudniçestwo"-nyň Jemgyýetçilik geňeşine ýolbaşçylyk etdi, 2025-nji ýylyň mart aýyndan bäri bolsa agentligiň ýolbaşçysynyň orunbasary wezipesinde işledi. Şeýlelikde, täze ýolbaşçy häzirki gün tertibine çuňňur ornaşan hem-de Arkalaşyk giňişliginde ynsanperwer hyzmatdaşlygyň mehanizmleri bilen gowy tanyşdyr.
Igor Çaýka O.Ýe. Kutafin adyndaky Moskwanyň döwlet hukuk akademiýasynyň (halkara hususy hukugy instituty) uçurymydyr. Onuň hünär üstünlikleri döwlet we jemgyýetçilik sylaglary bilen, şol sanda «Watan öňündäki hyzmatlary üçin» IV derejeli ordeni hem-de Russiýa Federasiýasynyň Prezidentiniň Hormat haty bilen sylaglanypdyr.
Häzirki wagtda "Rossotrudniçestwo" jemgyýetçilik diplomatiýasynyň esasy gurallarynyň biri bolup çykyş edýär, bilim, medeniýet we watandaşlary goldamak ugurlarynda tagallalary birleşdirýär. Agentligiň işinde GDA ýurtlaryna aýratyn üns berilýär, bu ýerde «Täze nesil» atly gysga möhletli tanyşdyryş saparlary maksatnamasy we «Missiýa dobro» halkara meýletinçilik maksatnamasy ýaly möhüm başlangyçlar amala aşyrylýar.
Türkmenistanyň 2026-njy ýylda GDA-da başlyklyk etmegi hem-de Arkalaşygyň 35 ýyllygynyň bellenilmegine taýýarlyk görülýän şertlerde, agentligiň täze ýolbaşçylygyndaky işi medeni-ynsanperwer gatnaşyklary berkitmäge we ýaşlar hem-de ylmy alyş-çalyş mümkinçiliklerini giňeltmäge gönükdiriler.
Bellenilenden soň dessine Igor Çaýka täze wezipesindäki işiniň esasy ugurlaryny kesgitledi. Resmi beýanatda ol "Rossotrudniçestwo" üçin ileri tutulýan ugurlaryň «düşnükli, dolandyrylýan we netijä gönükdirilen modeliň» döredilmegi boljakdygyny belledi.
«Rossotrudniçestwo-nyň öňünde giň gerimli wezipeler durýar. Toplanan tejribäni ulgamlaşdyrmak, hereket edýän maksatnamalaryň netijeliligini ýokarlandyrmak, daşarky ynsanperwer ugurda işleýän döwlet, jemgyýetçilik we ekspert düzümleriniň tagallalaryny birleşdirmek zerurdyr», — diýip, Çaýka häzirki halkara ýagdaýlaryň dartgynly şertlerinde agentligiň aýratyn jogapkärçiligini nygtady.
