Türkmenistan we TASS ýubileý ýylynyň maglumat gün tertibini emele getirýärler
Russiýanyň TASS habarlar agentliginiň baş edarasynda geçirilen duşuşyk ýakyn geljek üçin media hyzmatdaşlygynyň esasy ugurlaryny tassyklady. Türkmenistanyň Russiýa Federasiýasyndaky ilçihanasynyň diplomatlary hem-de GDA-nyň Ýerine ýetiriji komitetiniň wekilleri TASS-yň baş direktorynyň orunbasary Aleksandr Kopnow bilen bilelikde Arkalaşygynyň umumy naglumat giňişligine integrasiýa mehanizmlerini ara alyp maslahatlaşdylar.
Gepleşigiň esasy mowzugy Türkmenistanyň öňdebaryjy köpçülikleýin habar beriş serişdeleriniň GDA-nyň döwlet maglumat agentlikleriniň ýolbaşçylarynyň geňeşi bilen işjeň hyzmatdaşlygy boldy. Bu geňeşe Andreý Kondraşow ýolbaşçylyk edýär. Taraplar diňe bir habar alyş-çalşynyň möçberini artdyrmak däl, eýsem 2026-njy ýylda geçiriljek iri çäreleri beýan etmegiň çemeleşmelerini hil taýdan täzelemek boýunça hem özara isleglerini tassykladylar.
Bu işde Türkmenistanyň Garaşsyzlygynyň 35 ýyllygy bilen bagly temalaryň ilerledilmegine aýratyn orun berilýär. Bu sene GDA-nyň hem 35 ýyllygy we ýurdumyzyň GDA-da başlyklyk edýän ýyly bilen gabat gelýär. TASS bilen ýakyn utgaşykly alnyp baryljak iş bu wakalaryň halkara derejesinde giň we çuňňur beýan edilmegini üpjün eder hem-de baýramçylyk senelerini maglumat diplomatiýasynyň täsirli guralyna öwürer.
