Ýagşymyradow Belfastdaky PFL ýaryşynda Pedrony ýeňdi
Türkmenistanly söweşiji Döwletjan Ýagşymyradow Demirgazyk Irlandiýanyň Belfast şäherinde geçirilen Professional Fighters League (PFL) ýaryşynda awstraliýaly Taýson Pedrony ýeňdi.
Bu duşuşyk türkmen türgeni üçin möhüm tapgyr boldy, sebäbi ol 2025-nji ýylyň oktýabr aýynda geçirilen PFL Road to Dubai ýaryşynda amerikaly Kori Andersondan eminleriň biragyzdan çykaran karary bilen ýeňlipdi.
Söweşden soň beren interwýusynda Döwletjan Ýagşymyradow Taýson Pedro bilen bolan duşuşyk barada pikirini paýlaşyp, garşydaşynyň ýokary derejeli türgendigini aýtdy. Onuň aýtmagyna görä, awstraliýaly söweşiji güýçli garşydaş boldy.
Indiki söweşi we mümkin bolan garşydaşy barada soraga Ýagşymyradow häzirlikçe anyk maglumatyň ýokdugyny, emma islendik wagtda islendik garşydaş bilen oktagona çykmaga taýýardygyny aýtdy.
“Göreş — meniň durmuşym,” — diýip, söweşiji nygtady.
Söhbetdeşliginiň ahyrynda türgen goldaw berenleriň hemmesine minnetdarlyk bildirip, Türkmenistanyň Prezidentine hem aýratyn sagbolsun aýtdy. Häzirki wagtda Ýagşymyradowyň hasabynda 26 ýeňiş, sekiz ýeňliş we bir deňe-deň hasap bilen tamamlanan duşuşyk bar.
Pedro üçin Belfastdaky bu söweş 2024-nji ýylyň mart aýyndan bäri ilkinji boldy. Şonda ol UFC Fight Night 238 ýaryşynda braziliýaly Witor Petrinodan hem eminleriň karary bilen ýeňlipdi. Onuň statistikasynda 10 ýeňiş we alty ýeňliş bar.
Belfastdaky ýeňiş Ýagşymyradowyň PFL ýaryşlaryndaky ornuny pugtalandyrdy we halkara derejede türkmen söweşijisi üçin möhüm netije boldy.
