Türkmenistan we Hytaý 2030-njy ýyla çenli hyzmatdaşlyk strategiýasyny tassykladylar
Aşgabat we Pekin hyzmatdaşlygyň täze derejesine çykdylar. 16-njy aprelde wise-premýerler Raşid Meredowyň we Din Sýuesýanyň başlyklyk etmeginde geçirilen Hyzmatdaşlyk boýunça türkmen-hytaý hökümetara komitetiniň ýedinji mejlisi ýakyn ýyllar üçin sebit ykdysadyýetiniň keşbini kesgitleýän taryhy resminamalar toplumyna gol çekilmegi bilen tamamlandy.
Energetika we gaz: «Galkynyşyň» täze tapgyry. Esasy waka gaz pudagynda hyzmatdaşlygyň ýörelgeleri hakynda Baş Ylalaşygyna gol çekilmegi boldy. Taraplar ägirt uly «Galkynyş» gaz känini özleşdirmegiň täze tapgyrlaryna geçilýändigini resmi taýdan tassykladylar. Bu diňe bir hereket edýän turba geçirijini ulanmak däl-de, eýsem Türkmenistan-Hytaý gaz geçirijisiniň kuwwatyny giň gerimde artdyrmak diýmekdir.
Tehnologik ösüş we emeli aň. Ikitaraplaýyn gün tertibinde ilkinji gezek ýokary tehnologiýalar ugry takyk kesgitlendi. Türkmenistanyň degişli ministrligi bilen HHR-iň Milli ösüş we özgerişler komissiýasynyň arasynda gol çekilen emeli aň ulgamynda hyzmatdaşlyk etmek baradaky Ähtnama ykdysadyýetiň sanly özgertmeleri üçin gapylary açýar. Bu ugry «Lu Ban ussahanasynyň» işe girizilmegi we energetika boýunça bilelikdäki okuw merkeziniň döredilmegi has-da baýlaşdyrýar.
Logistika geçelgeleri: Hytaýdan Ýewropa çenli Türkmenistan esasy üstaşyr merkez hökmündäki ornyny tassyklady. Täze ylalaşyklar «Hytaý – Türkmenistan – Hazar deňzi – Ýewropa» ugurlarynyň üstünde işlemegi we Günorta-Gündogar Aziýa çykmagy berkitdi.
Ynsanperwerlik köprüsi. Bäş ýyllyk hyzmatdaşlyk maksatnamasy (2026–2030) medeniýet merkezleriniň özara açylmagyny we Hytaýyň adaty lukmançylyk merkeziniň işe girizilmegini öz içine alýar. Ylymlar akademiýalarynyň we öňdebaryjy ýokary okuw jaýlarynyň özara gatnaşygy ähli uly göwrümli taslamalar üçin ylmy binýady üpjün eder.
Resminamalaryň sanawy Türkmenistanyň DIM-niň saýtyndaky habarda berilýär.
