Türkmenistanyň Ilçisi Halkara Sanly Hyzmatdaşlyk Guramasynyň Baş sekretary bilen duşuşdy
14-nji aprelde Türkmenistanyň Saud Arabystany Patyşalygyndaky Adatdan daşary we Doly ygtyýarly Ilçisi Muhammetgeldi Aýazow Halkara Sanly Hyzmatdaşlyk Guramasynyň Baş sekretary hanym Dimah Al-Ýahýa bilen duşuşdy.
Duşuşykda Halkara Sanly Hyzmatdaşlyk Guramasy we oňa agza döwletler bilen Türkmenistanyň arasynda özara bähbitli sanly hyzmatdaşlygy ýola goýmak we ösdürmek meselesi maslahatlaşyldy. Has takygy, Deemah Al-Ýahýa Guramanyň alyp barýan işi barada giňişleýin gürrüň berdi. Şeýle-de ol, strategiki maksatlarynyň bir bölegi hökmünde, Merkezi Aziýa bilen gurama agza döwletleriň arasynda sanly hyzmatdaşlygy güýçlendirmäge, serhetüsti maýa goýumlaryny ösdürmäge we özara çemeleşmeleri utgaşdyrmak boýunça ýokary derejeli ministrler derejesinde gepleşikleri geçirmäge ähmiýet berýändiklerini belledi.
Ilçi M.Aýazow, soňky ýyllarda Türkmenistanda sanly ykdysadyýeti ösdürmeklige aýratyn ähmiýet berilýänidigini, munuň bilen bagly 2026-2028-nji ýyllar üçin täze Konsepsiýasynyň we Döwlet maksatnamasynyň tassyklanylandygyny mälim etdi.
ORIENT
