Özbegistanda Yslam siwilizasiýasy merkezinde Hatdatlyk mekdebi döredildi
Özbegistandaky Yslam siwilizasiýasy merkezi Hatdatlyk mekdebiniň döredilendigini mälim etdi. Bu möhüm ylym-bilim taslamasy beýik serkerde Emir Teýmiriň doglan gününiň 690 ýyllygyna bagyşlanan «Teýmirliler döwrüniň hatdatlyk mirasy — däpleriň dowamlylygy» atly seminaryň çäklerinde yglan edildi.
Seminar yslam sungaty, taryh we filologiýa ugurlarynyň öňdebaryjy hünärmenlerini birleşdirip, hatdatlyk sungatynyň ruhy we medeni ähmiýetini giňişleýin ara alyp maslahatlaşmak üçin möhüm meýdança boldy.
- Yslam siwilizasiýasy merkeziniň ýanynda Hatdatlyk mekdebini döretmek başlangyjy 2025-nji ýylyň 29-njy ýanwarynda ýurdumyzyň Prezidenti hormatly Şawkat Mirziýoýew tarapyndan öňe sürüldi. Bir ýyldan soňra bu başlangyç halkara guramalarynyň giň goldawyna eýe boldy. Teýmirlilere bagyşlanan maslahatyň çäklerinde bu taslama resmi taýdan işe girizildi. Hatdatlyk mekdebiniň döredilmegi milli medeni mirasy goramak we wagyz etmek ugrunda alnyp barylýan giň gerimli özgertmeleriň dowamy bolup durýar, - diýip, Firdaws Abduhalikow çärä gatnaşyjylaryň öňünde eden çykyşynda belledi.
Bellenilişi ýaly, Teýmirliler döwründe hatdatlyk iň ýokary ösüş derejesine ýetip, medeni ösüşiň nyşanyna öwrüldi. Alymlaryň maglumatlaryna görä, merkezleşdirilen döwlet döredilenden soň Emir Teýmir paýtagtda dürli sebitlerden iň ökde hatdatlary jemledi. Sulus, nastalik we kufi ýaly ýazuw görnüşleri gülläp ösdi. Şeýle hem meşhur «Boýsungur» Gurhan golýazmasy ýaly ajaýyp eserler döredildi.
Halkara bilermenler bu başlangyja ýokary baha berdiler. Hususan-da, IRCICA-nyň baş direktory Mahmud Erol Kylyç yslam hatdatlygynyň dünýä medeniýetindäki ornuny, onuň ýokary estetiki we ruhy gymmatyny nygtady. Türkiýäniň golýazmalar müdirliginiň başlygy Joşkun Yylmaz Süleýmaniýe kitaphanasynda saklanýan seýrek golýazmalar barada maglumat berip, olaryň köpüsiniň Merkezi Aziýa bilen baglydygyny aýtdy. Beýik Britaniýadan Al-Furqan Islamic Heritage Foundation gaznasynyň direktory Sali Şahsuwari Teýmirliler döwrüni hakyky intellektual we medeni galkynyş döwri hökmünde häsiýetlendirdi.
Bellenilişi ýaly, Hatdatlyk mekdebi diňe bilim berýän edara däl, eýsem ylmy-barlag we medeni merkez hökmünde hem iş alyp barar. Onuň çäklerinde hünärmenleri taýýarlamak, golýazma mirasyny goramak we dikeltmek, şeýle hem halkara hyzmatdaşlygyny ösdürmek göz öňünde tutulýar.
