Türkmenistanyň Prezidenti Aşgabat – Türkmenabat ýokary tizlikli awtomobil ýolunyň jemleýji tapgyrynyň açylyş dabarasyna gatnaşdy
10-njy aprelde Prezident Serdar Berdimuhamedowyň gatnaşmagynda Lebap welaýatynda Aşgabat–Türkmenabat ýokary tizlikli awtomobil ýolunynyň jemleýji bölegi — Mary–Türkmenabat aralygy ulanmaga berildi. Indi paýtagt bilen ýurduň gündogar sebitini 600 kilometrlik iň döwrebap ýol birleşdirýär. Bu taslama Türkmenistany Beýik Ýüpek ýolunyň gaýtadan dikeldilmeginde esasy logistika merkezine öwürýär.
Öňdebaryjy tehnologiýalar we dünýä standartlary. 2019-njy ýylda başlanan bu taslama ýerli işewürlik üçin synag boldy — gurluşyk Türkmenistanyň Senagatçylar we telekeçiler birleşmesiniň agzalarynyň güýji bilen amala aşyryldy. Netije halkara bilermenler jemgyýeti tarapyndan tassyklandy. Fransiýanyň «Grenobloise d’Elektronique et d’Automatismes» we Hytaýyň «Shandong Jiangfeng New Material Technology Co., Ltd.» kompaniýalary iň ýokary standartlara laýyk gelýän şahadatnamasyny gowşurdylar.
Howpsuzlyk we IT: Wideogözegçilik, ulag akymyna gözegçilik we kibergorag ulgamlary (ISO 27001).
Hil we takyklyk: Ölçegleri dolandyrmak (ISO 10012) we ýokary hilli dolandyryş (ISO 9001).
Ekologiýa: Daşky gurşawa jogapkärli çemeleşme (ISO 14001).
Ini 34,5 metr bolan alty zolakly awtobanyň ýol örtügi birinji derejeli döwrebap serişdelerden — ýokary hilli asfalt-betondan, sintetik örtükden, torlardan, ýoluň netijeli gatlarynyň mäkämligini artdyrýan beýleki serişdelerden ybaratdyr. Bu bolsa uzak möhletleýin durnuklylygy kepillendirýär.
Ykdysady netije: Tizlik we integrasiýa “Bu ýokary tizlikli awtomobil ýoly ýolagçylaryň we ýükleriň örän gysga wagtda gatnadylmagyny üpjün eder” diýip, Prezident Serdar Berdimuhamedow açylyş dabarasynda belledi. Täze ýol diňe bir welaýatlary birleşdirmek bilen çäklenmän, eýsem Türkmenistany dünýäniň ulag ulgamyna integrasiýa edýär.
Infrastrukturanyň amatlylygy Ýoluň ugrunda sürüjiler we ýolagçylar üçin doly derejeli ekoulgam döredildi: duralgalar, dynç alyş zolaklary, ýangyç guýujy beketler we döwrebap ýol gözegçilik nokatlary. Hereketi dolandyrmak intellektual ulgam arkaly amala aşyrylýar, ol ulag akymy baradaky maglumatlary real wagt tertibinde geçirýär.
Aşgabat — Türkmenabat ýokary tizlikli awtomobil ýolunyň gurluşygynyň tamamlanmagy — bu sebitleri ösdürmek üçin güýçli itergidir we ýurduň «BMG-niň durnukly ulag boýunça onýyllygynyň (2026–2035)» çäklerinde durnukly ösüşe gönükdirilen ulag strategiýasynyň durmuşa geçirilmeginiň aýdyň mysalydyr.
