Beidou enjamlary bilen üpjün edilen tehnika Sinszýanda pagta ekişiniň netijeliligini ýokarlandyrýar
Hytaýyň demirgazyk-günbatarynda ýerleşýän Sinszýan-Uýgur awtonom sebitindäki Usu şäherinde takmynan 113 000 gektar meýdanda pagta ekilýär. Netijeliligi we takyklygy ýokarlandyrmak maksady bilen, ýerli Beidou (BDS) hemra nawigasiýa ulgamy bilen üpjün edilen akylly tehnika giňden ulanylýar.
Beidou ulgamy bilen enjamlaşdyrylan traktorlar pagta meýdanlarynda öňünden kesgitlenen ugurlar boýunça päsgelçiliksiz hereket edip, damjalaýyn suwaryş lentalaryny ýerleşdirýär, polietilen örtükleri ýazýar hem-de tohumlary bir wagtda ekýär.
Standartlaşdyrylan amallar ekişdäki ýalňyşlygy iki santimetre çenli azaltmaga mümkinçilik berýär, şol bir wagtda çykdajylary peseldip, netijeliligi ýokarlandyrýar.
“Bu ýyl men 1700 mu-dan gowrak (takmynan 113,4 gektar) meýdanda pagta ekdim. Beidou ulgamy bilen üpjün edilen ekiş enjamy hatarlaryň deň bolmagyny üpjün edip, ýeri tygşytlamaga kömek edýär”, — diýip, pagta ösdürip ýetişdirýän daýhan Li Sýuanlaý aýtdy.
Ýerli oba hojalyk edaralary şäherde uly ekiş maşynlary we dronlar ýaly döwrebap enjamlaryň ulanylyşyny giňeltmegi meýilleşdirýändiklerini, şeýlelikde pagta ösdürip ýetişdirmek we ýygnamak işleriniň doly mehanizasiýasyna ýetmegi maksat edinýändiklerini bellediler.
