Russiýanyň alymlary agyr tehnikalar we oba hojalygy üçin ýokary berklige eýe bolan polat döretdiler
Belgorod döwlet milli barlag uniwersitetiniň («BelGU» YBI) hünärmenleri bir wagtda hem ýokary berklige, hem-de çeýelige eýe bolan polady öndürmegiň täze usulyny işläp taýýarladylar. Bu täze tehnologiýa metalyň gurluşyny mikro derejesinde dolandyrmaga mümkinçilik berýär: döwülmäge ýykgyn bölejikler çeýe gatlaklar bilen çalşyrylýar.
Bu innowasion garyndy 1 190 MPa çenli ägirt uly basyşa çydap bilýär we dargamazdan ep-esli uzalyp bilýär. Alymlar metallurgiýanyň esasy meseleleriniň birini çözmegi başardylar — indi ýokary berkli metal döwülmeýär.
Bu işläp taýýarlama ulag we oba hojalygy pudaklary üçin strategiki ähmiýete eýedir. Täze polatdan agyr şertlerde işleýän toprak işläp bejeriji tehnikalaryň asma bölekleri we möhüm düwünleri öndürilmegi meýilleşdirilýär.
Taslamanyň önümçilik hyzmatdaşy hökmünde Birleşen metallurgiýa kompaniýasy («OMK» PJ) çykyş edýär. Ýakyn wagtda topar materialy hakyky tehnikalarda synag etmek üçin tejribe barlaglaryna başlar.
Bu tehnologiýanyň ornaşdyrylmagy rus öndürijilerine import garyndylarynyň ornuny tutmaga we içerki enjamlaryň ygtybarlylygyny ýokarlandyrmaga mümkinçilik berer. Bu möhüm pudaklarda howpsuzlygy we gurluşlaryň uzak ömürliligini üpjün etmekde möhüm ädimdir.
ORIENT
