Türkiýede syýahatçylyk: 2026-njy ýylda Kaçkar daglarynda halkara ýarmarka we ultramarafon geçiriler
Türkiýäniň demirgazygynda, Rize we Artwin welaýatlarynda ýerleşýän Kaçkar daglary tebigaty we ekstremal dynç alyşy halaýanlaryň arasynda barha meşhur bolýar. Buzluk kölleri we el degmedik tokaýlary bilen tanalýan bu özboluşly sebit uly halkara çäreleriniň geçirilýän ýerine öwrülýär.
Bahar paslynyň esasy wakasy 2026-njy ýylyň 17–18-nji apreli aralygynda Rize şäherinde geçiriljek «Kaçkar» atly halkara syýahatçylyk ýarmarkasy bolar.
«Çaý bazaryndaky» işewürlik meýdançasy
Türkiýäniň Medeniýet we syýahatçylyk ministrliginiň goldaw bermeginde guralýan sergi 1000-den gowrak hünärmeni we 3000-den artyk myhmany bir ýere jemlär. Adaty sergilerden tapawutlylykda, Rizedäki maksatnama täze hyzmatdaşlary tapmaga we durnukly ösüş ugurlaryny ara alyp maslahatlaşmaga gönükdirilendir.
Gatnaşyjylar Gara deňiz sebitini dünýä derejesindäki syýahatçylyk merkezine öwürmek baradaky maslahatlara we seminarlara gatnaşyp bilerler.
Ýyl boýy başdan geçirmeler we saglyk
Kaçkar sebitiniň dürli möwsümlerde hödürleýän mümkinçilikleri:
• Alpinizm we trekking: 3937 metr beýiklikdäki Kaçkar daglary daga çykmak üçin ajaýyp nokatdyr.
• Gyşky sport: bu ýerde heli-ski we gar üstünde gezelenç üçin dünýäniň iň gowy ýerleriniň käbirleri ýerleşýär.
• Ekologiýa we medeniýet: milli obalar, tulum sazynyň sesi we meşhur çaý meýdanlary ýerli durmuş bilen tanyşmaga mümkinçilik berýär.
• Saglyk: Aýderdäki termal çeşmeler we arassa dag howasy dynç almak üçin amatly şert döredýär.
Sebitiň abraýy diňe bir işewürlik çäreleri bilen däl, eýsem sport wakalary bilen hem ýokarlanýar. Syýahatçylyk ýarmarkasyndan soň, 2026-njy ýylyň 11–13-nji sentýabry aralygynda Rizede KAÇKAR BY UTMB halkara ultramarafony geçiriler.
Ösen infrastruktura bilen ýabany tebigatyň utgaşmagy Kaçkar daglaryny adaty kurortlaryň alternatiw görnüşini gözleýänler üçin hökmany barylmaly ýere öwürýär.
ORIENT
