Ukrainadaky türkmen ýaşlary Bütindünýä saglyk güni mynasybetli “Saglyk hepdeliginiň” çäginde birnäçe sport çärelerini geçirdiler
Bütindünýä saglyk guramasy tarapyndan döredilen we her ýylyň 7-nji aprelinde bellenilýän Bütindünýä saglyk gününiň öňüsyrasynda, Türkmenistanyň Ukrainadaky Ilçihanasy “Saglyk hepdeligini” geçirdi. Bu hepdelik ýaşlaryň we daşary ýurtlardaky watandaşlaryň arasynda işjeň we sagdyn durmuş ýörelgelerini wagyz etmäge gönükdirilen birnäçe sport we dynç alyş çärelerini öz içine aldy.
Geçirilen çäreleriň çäklerinde, Türkmenistanyň Ilçihanasy tarapyndan mini-futbol ýaryşy, Kiýew şäheriniň döwrebap syýahatçylyk ýerleriniň we taryhy seýilgähleriň birinde hem-de Ilçihananyň binasynda ýeňil atletika ýaryşy, agyr atletika we el göreşi (armwresliň) boýunça ýaryşlar guraldy. Çäreler intellektual bäsleşikler – Ilçihanada guralan küşt we şaşka ýaryşy bilen tamamlanyp, bu ýaşlaryň sazlaşykly ösüşe ygrarlylygyny, beden işjeňligini we intellektual ösüşi birleşdirýändigini görkezýär.
Çäreler dostluk, özara hormat goýmak we agzybirlik äheňinde geçirildi. Ýaryşlar bäsleşik esasda geçendigine garamazdan, olaryň esasy netijesi agzybirlik ruhuny berkitmek, sagdyn durmuş ýörelgesine dowamly höwes döretmek we işjeň durmuş ýörelgesini wagyz etmekden ybarat boldy.
Saglyk hepdeligi, “Garaşsyz, baky Bitarap Türkmenistan – bedew batly at-myradyň mekany” ady bilen dowam edýän şygary astynda geçirilendigi üçin aýratyn möhüm ähmiýete eýe boldy. Gatnaşyjylar ýylyň şygarynda beýan edilen gymmatlyklaryň - tutanýerliligiň, öňe hereketiň we kämillige ymtylmagyň sportda we intellektual bäsleşiklerde ýaşlary umumy maksatlara birleşdirýändigini bellediler.
Ukrainada okaýan we ýaşaýan türkmen ýaşlary sagdyn durmuş ýörelgelerine berk ygrarlydyklaryny görkezýärler, yzygiderli beden maşklary bilen meşgullanýarlar we bu gymmatlyklary deň-duşlarynyň arasynda işjeň wagyz edýärler. Olar Türkmenistanyň Ilçihanasy tarapyndan guralýan çärelere gatnaşmagy öz Watany bilen gatnaşyklary berkitmek, aragatnaşyk we üznüksiz ruhy baglanyşygy saklamak üçin möhüm mümkinçilik hökmünde görýärler.
Çäräniň dowamynda diplomatlar Türkmenistanyň BSGG we BMG bilen hyzmatdaşlykda sebitleýin we global derejede saglyk diplomatiýasyny işjeň ösdürýändigine üns çekdiler. Diýarymyz köp ýyllaryň dowamynda dürli keselleriň öňüni almak we olaryň döremegine sebäp bolýan töwekgelçilik faktorlaryna garşy göreşmek boýunça yzygiderli işleri alyp barýar. Türkmenistan BSGG-niň Ýewropa sebitinde temmäkä garşysyna göreşmek we çilim çekmegiň öňüni almak babatda öňdebaryjy orny eýeleýär we ýaşlaryň temmäkä garşy başlangyçlary iň netijeli strategiýalaryň biridir.
Ýaşlar döwlet tarapyndan berilýän, şol sanda Ilçihana tarapyndan berilýän goldawlaryň, ýaşlaryň daşary ýurtlarda kämilleşmegi üçin amatly şertleri döretmäge goşant goşýandygyny bellediler. Gatnaşyjylar Watandan uzakdygyna garamazdan, olara berilýän yzygiderli üns, alada, sagdyn nesil we hemmetaraplaýyn goldaw üçin Türkmenistanyň Ýolbaşçylaryna tüýs ýürekden hoşallygyny bildirdiler.
“Saglyk hepdeliginiň” bellenilmegi türkmen ýaşlarynyň, nirede bolsalar-da, milli gymmatlyklara ygrarlylygyny, ösüşe, işjeň we sagdyn durmuşa bolan ymtylmalaryny görkezip, ýurduň halkara derejesinde oňyn abraýyny pugtalandyrmaga goşant goşýandygynyň aýdyň subutnamasy bolup durýar.
