Aşgabatda Diller institutynyň we Astrahan döwlet uniwersitetiniň arasynda ylalaşyga gol çekildi
Döwletmämmet Azady adyndaky Türkmen milli dünýä dilleri instituty bilen W.N. Tatişew adyndaky Astrahan döwlet uniwersiteti hyzmatdaşlyk barada Ylalaşyga resmi taýdan gol çekdiler. Bu resminama iki ýurduň ýokary okuw mekdepleriniň arasynda ylmy gatnaşyklary ösdürmek, okuw işine innowasiýalary ornaşdyrmak we medeni dialogy pugtalandyrmak üçin täze mümkinçilikleri açýar. Bu barada Türkmenistanyň Bilim ministrliginiň resmi saýtynda habar berilýär.
Gol çekilen ylalaşyk bilim maksatnamalarynyň hilini ýokarlandyrmaga gönükdirilendir we tejribe alyşmaga aýratyn ähmiýet berýär. Hyzmatdaşlygyň esasy ugurlarynyň biri akademiki hereketlilik bolar: talyplar, mugallymlar we ylmy işgärler alyş-çalyş maksatnamalaryna hem-de hünär derejesini ýokarlandyrmak üçin tejribeliklere gatnaşmaga mümkinçilik alarlar.
Uniwersitetleriň strategiki hyzmatdaşlygy bilelikdäki ylmy barlaglary geçirmek, uzak aralykdan okatmagyň sanly maksatnamalaryny ýola goýmak, okuw-usuly materiallary özara alyşmak, şeýle hem hünärmenleriň halkara maslahatlaryna we simpoziumlaryna işjeň gatnaşmagyny göz öňünde tutýar. Şeýle çemeleşme ylmyň häzirki zaman gazananlaryny okuw prosesine ornaşdyrmaga mümkinçilik berer.
Resminamada bilelikdäki innowasion taslamalary döretmäge we iki okuw mekdebiniň ylmy gazananlaryny özünde jemleýän okuw gollanmalaryny alyşmaga aýratyn üns berilýär. Bu hyzmatdaşlyk öňdebaryjy bilimlere we halkara tejribesine eýe bolan täze nesil hünärmenleri taýýarlamakda möhüm ädim bolar.
Bu giň gerimli başlangyçlaryň durmuşa geçirilmegi Türkmenistanyň bilim ulgamyndaky döwlet goldawy we özgertmeleri netijesinde mümkin boldy. Döredilen şertler milli ýokary okuw mekdeplerine halkara gatnaşyklary giňeltmäge we milli ýokary bilimi dünýä bilim giňişligine üstünlikli integrirlemäge mümkinçilik berýär.
ORIENT
