AD Ports Group 2025-nji ýylda rekord girdeji we halkara täsiriniň artandygyny yglan etdi
Logistika we port çözgütleriniň dünýä derejesindäki öňdebaryjy üpjün edijisi bolan AD Ports Group (Abu-Dabi, BAE) 2025-nji ýyl boýunça ýyllyk hasabatyny çap etdi. Ählumumy kynçylyklara we üpjünçilik zynjyrlaryndaky bökdençliklere garamazdan, topar ýyly rekord derejedäki girdeji we arassa peýda bilen tamamlady.
«Baglanyşyklary berkitmek» atly hasabata görä, kompaniýanyň girdejisi rekord 20,77 milliard BAE dirhamyna ýetip (20% ösüş), arassa peýdasy bolsa 2,07 milliard dirham boldy (16% ösüş). Bu görkezijiler kompaniýanyň Ýewropa, Afrika we Aziýa boýunça esasy söwda ugurlarynda giňelmek strategiýasynyň netijelidigini tassyklaýar.
2025-nji ýyl AD Ports Group üçin «akylly internasionallaşma» ýyly boldy. Esasy wakalaryň arasynda:
• Abu-Dabide giňelme: CMA CGM Group bilen hyzmatdaşlykda Halifa portundaky konteýner terminalynyň giňeldilýändigi yglan edildi.
• Halkara giňelme: Topar Müsür we Siriýa terminallarynda paý satyn aldy, şeýle hem Pakistan we Angola bazarlarynda işine başlady.
• Ykrar edilmegi: Halifa porty dünýäniň iň uly konteýner portlarynyň sanawynda 39-njy orna çykdy (2019-njy ýylda 95-nji orunda ýerleşýärdi).
• Tehnologiki ösüş: Kompaniýa logistika ulgamynda iň köp (205) emeli aň agentlerini ulanandygy üçin Ginnesiň rekordlar kitabyna girizildi.
AD Ports Group-yň üstünlikleri BAE-niň nebite bagly bolmadyk ykdysadyýetiniň ösüşi bilen gönüden-göni baglanyşyklydyr. 2025-nji ýylda onuň möçberi ilkinji gezek 1 trillion ABŞ dollaryndan geçdi. Bu bolsa halkara hyzmatdaşlar we müşderiler üçin ýükleriň we maýanyň has çalt hem-de netijeli hereket edýän ygtybarly ekoulgamynyň döredilendigini aňladýar.
2026-njy ýyl üçin meýilnamalar Müsür, Pakistan we Siriýa portlarynda täze täjirçilik amallaryny işe girizmegi, şeýle hem port ulaglarynyň elektrifikasiýasy arkaly uglerod yzyny azaltmagy göz öňünde tutýar.
ORIENT
