OpenAI AGI-niň bosagasynda: Spud modeliniň taýýarlygy tamamlandy we ýörite bölüm döredildi
OpenAI kompaniýasy umumy emeli aňy (AGI) döretmek ýolunda iki möhüm ädim ätdi. Içerki duşuşykda baş direktor Sem Altman Spud kod ady bilen täze güýçli modeliň öňünden taýýarlanyş tapgyrynyň tamamlanandygyny yglan etdi. Şeýle hem kompaniýanyň gurluşynda AGI-ni ornaşdyrmak üçin jogapkär ýörite bölüm resmi taýdan döredildi.
Bu wakalar OpenAI-nyň superintellekti döretmekde nazary işlerden amaly taýýarlyga geçýändigini görkezýär. Altmaniň sözlerine görä, Spud modeli «örän güýçli» bolar we «ykdysady ösüşi hakykatdan hem tizleşdirip biler». Kompaniýa ilkinji netijeleri birnäçe hepdäniň dowamynda almagy meýilleşdirýär. Modeliň arhitekturasy barada maglumatlar häzirlikçe gizlin saklanýar.
Kompaniýanyň önümçilik bölümi indi resmi taýdan AGI Deployment («AGI-ni ornaşdyrmak bölümi») diýlip atlandyrylýar. Öň OpenAI AGI-niň uzak möhletli maksatdygyny belläp geçýän bolsa, indi bu düşünje kompaniýanyň resmi gurluşynyň bir bölegine öwrüldi. Bu ýagdaý Nvidia-nyň ýolbaşçysy Jensen Huangyň pudak eýýäm AGI derejesine ýetdi diýen beýanlarynyň fonunda bolup geçýär.
Spud taslamasyna serişdeleri jemlemek üçin kompaniýa Sora wideo generatorynyň programmasyny we API-sini ýapmak kararyna geldi. Şeýle hem Sem Altman howpsuzlyk toparlaryna gözegçiligi beýleki ýolbaşçylara tabşyrdy, özüniň bolsa maýa çekmek we ägirt uly maglumat merkezlerini gurmak bilen meşgullanjakdygyny aýtdy. Meýilnamalara görä, OpenAI-nyň çykdajylary 2029-njy ýyla çenli takmynan 115 milliard dollar bolar.
ORIENT
