Adobe Photoshop-y ýönekeýleşdirdi: indi redaktory ses we tekst arkaly dolandyrmak bolýar
Adobe kompaniýasy çylşyrymly retuşy programma bilen ýönekeý gepleşik görnüşine öwürýän akylly assistenti tanyşdyrdy. Indi dünýäde iň meşhur grafiki redaktorlaryň biri bolan Photoshop bilen işlemek smartfonda bellik ýazmakdan hem kyn däl.
Täze mümkinçilik brauzerler we mobil goşundylar üçin beta görnüşinde işe girizildi. Assistent ygtyýarly kontent bilen taýýarlanan Firefly modelleriniň esasynda işleýär. Bu professionallar üçin aýratyn möhümdir: döredilen şekilleri awtorlyk hukuklaryny bozmazdan täjirçilik taslamalarynda ulanmak bolýar.
Ulanyja diňe adaty dilde buýruk ýazmak ýa-da ses bilen aýtmak ýeterlik. Mysal üçin: «arkadaky adamlary aýyr», «ýumşak ýagtylyk goş» ýa-da «formaty 4:5 edip üýtget». Programma islege özbaşdak düşünýär, degişli gurallary saýlaýar we ähli amallary awtomatiki ýerine ýetirýär.
Tekst buýruklaryndan başga-da, Adobe AI Markup atly guraly hem hödürledi. Ol ulanyja suratda marker bilen çyzmaga mümkinçilik berýär — diňe obýektiň daşyny çyzsaňyz ýa-da kontur goýsaňyz, assistent haýsy bölegi üýtgetmelidigini düşünýär. Bu çylşyrymly şekilleri söz bilen düşündirmekden has amatlydyr.
Mundan başga-da, kompaniýa Firefly platformasynyň mümkinçiliklerini giňeltdi:
• fon we obýektleri bir basyşda aýyrmak;
• AI arkaly kanwany giňeltmek we hilini ýokarlandyrmak (upscaling);
• Google we OpenAI ýaly kompaniýalaryň 25-den gowrak üçünji tarap modellerini goldamak.
9-njy aprele çenli Creative Cloud tölegli ulanyjylary assistentden çäksiz peýdalanyp bilerler. Mugt hasap eýelerine bolsa 20 synag mümkinçiligi berilýär.
Möhüm ädimleriň biri hökmünde Microsoft bilen hyzmatdaşlyk ýola goýuldy: Adobe gurallary indi Copilot korporatiw kömekçisine ornaşdyryldy. Bu bolsa ofis işgärleriniň iş giňişliginden çykman PDF redaktirlemek ýa-da banner döretmek mümkinçiligini berýär. Şeýlelikde, Adobe diňe dizaýnerler üçin gural bolmagyny bes edip, hemmeler üçin elýeterli bolýar.
ORIENT
