Apple amatly iPhone 17e modelini täzeledi: 256 GB ýat we çalt zarýad
Apple kompaniýasy täze iPhone 17e modelini hödürledi. Bu smartfon täzelenen iPhone hatarynyň iň elýeterli enjamy boldy. Başlangyç bahasy 599 ABŞ dollary bolan täze model öňki dizaýny saklap galdy, emma býujet modeliniň ulanyş tejribesini ep-esli gowulandyrýan birnäçe möhüm täzelikler bilen üpjün edildi.
Esasy tehniki artykmaçlyklaryň biri MagSafe tehnologiýasynyň doly goldanylmagy boldy. Öňki wersiýalardan tapawutlylykda, iPhone 17e içine gurnalan magnitler bilen üpjün edildi, simsiz zarýadyň kuwwaty bolsa 15 Wt çenli ýokarlandy. Indi enjamyň zarýadyny 30%-den 46%-e çenli bary-ýogy 15 minutda doldurmak bolýar, bu bolsa gündelik ulanyşda smartfony has amatly edýär.
Ulanyjylar üçin ýene bir gowy täzelik — esasy ýadyň möçberiniň 256 GB çenli artdyrylmagydyr. Enjamyň içinde iň täze Apple A19 çipi ýerleşdirilip, ýokary iş tizligini üpjün edýär. Ekrany goramak üçin bolsa indi Ceramic Shield goragynyň ikinji nesli ulanylýar — bu aýna premium wersiýalar bolan iPhone 17 modellerindäki ýaly berkdir.
Şol bir wagtyň özünde Apple 60 Gs täzeleniş ýygylygy bolan ekrany saklap galdy we uly modeller bilen içerki bäsdeşligiň öňüni almak üçin Dynamic Island funksiýasyny goşmady. Enjamda diňe bir kamera bar bolsa-da, täze algoritmler diňe adamlaryň däl, eýsem haýwanlaryň hem ýokary hilli portretlerini düşürmäge mümkinçilik berýär. Mundan başga-da, surata düşürilenden soň fokusy üýtgetmek mümkinçiligi hem bar.
ORIENT
