Apple Face ID funksiýaly «akylly» wideo gapy jaňyny döretmegi meýilleşdirýär
Apple kompaniýasy öý howpsuzlygy bazaryna çykmaga taýýarlanýar. Home ekoulgamyndaky täze önüm – ýüzi tanamak funksiýaly wideo gapy jaňydyr. Enjam eýelerine açarsyz öýe girmek mümkinçiligini berer: gurnalan ulgam ýüzi skanirläp, Face ID tehnologiýasy arkaly elektron gulpy awtomatiki açar. Bu tehnologiýa iPhone-da ulanylýan Face ID bilen meňzeşdir.
Artykmaçlyklary we gizlinlik
Apple üçin esasy artykmaçlyk maglumat goragyndaky abraýynda bolup durýar. Ulanyjylaryň wideo ýazgylaryny ýygnamagy bilen bagly tankytlara köplenç sezewar bolýan bäsdeşlerden tapawutlylykda, Apple doly gizlinlige ünsi jemlär. Wideo akymy degişli şifrleme bilen goralar we ýüz tanama göni enjamda amala aşyrylar, bu bolsa maglumatlaryň bulut saklawhanalaryna syzmagyny aradan aýyrar.
Bazar bäsdeşligi
Apple-iň gapy jaňlary we wideo gapy jaňlaryna bolan gyzyklanmasy Amazonyň (Ring brendiniň eýesi) abraý meseleleriniň netijesinde artdy. Ulanyjylaryň wideo maglumatlaryny giň gerimli gözegçilik ulgamlarynda ulanmak bilen baglanyşykly dawalardan soň Amazon-a bolan ynam pese gaçdy. Analitikler, häzirki wagtda Apple üçin öz howpsuz önümüni çykarmak üçin amatly pursadyň dörändigini aýdýarlar.
Ulanyjylar nämä garaşmaly?
Enjam doly Apple Home ekoulgamyna integrirlener. Bu iPhone, Apple Watch ýa-da Siri ses buýruklary arkaly gapyny dolandyrmaga mümkinçilik berer. Täze önümiň 2026-njy ýylda çykmagyna garaşylýar.
ORIENT
