Google Android 17-ni tizleşdirýär: täze DeliQueue ulgamy ähli smartfonlaryň işleýşini has akgynly eder
Google kompaniýasy Android 17-niň beta wersiýasynda möhüm täzelik hödürledi. Ol ulgamdaky iň köne meseleleriň birini — aýlaw we animasiýa wagtyndaky mikrogijikmeleri aradan aýyrýar. Işläp düzüjiler operasion ulgamynyň meseleleri gaýtadan işleýşini düýpli üýtgedip, prosessora güýç düşende-de interfeýsiň çalt jogap bermegini üpjün etdiler.
Esasy üýtgeşme ulgam habarlaryny gaýtadan işlemek guralyna degişli boldy. Öň meseleler nobatda biri-birini saklap bilýärdi: çylşyrymly bir amal gutarýança beýlekiler garaşyp durýardy. Bu bolsa kadrlaryň düşmegine getirýärdi we ulanyjylar muny ekranyň “säginmegi” hökmünde görýärdiler.
Android 17-de DeliQueue atly täze ulgam ornaşdyryldy. Onuň işi häzirki zaman elektron nobat ulgamyna meňzeýär: meseleler indi ähli ulgamy saklamagyň ýerine parallel ýerine ýetirilýär. Bu bolsa fon prosesleriniň tamamlanmagyna garaşman, interfeýsiň derrew täsirlenmegine mümkinçilik berýär.
Synaglar interfeýs “säginmeleriniň” ulgam programmalarynda 7,7%, üçünji tarap programmalarynda bolsa 4% azalandygyny görkezdi. Mundan başga-da, smartfonlar programmalary biraz çalt açyp başlar. Iň möhümi — bu koduň düýpli gowulaşdyrylmagydyr we täze operasion ulgam wersiýasyna täzelenen ähli smartfonlaryň işleýşine oňyn täsir eder.
Adaty ulanyjy üçin bu enjamy has amatly ulanmagy aňladýar: sosial tor lentasy has akgynly geçiriler, penjireleriň açylyş animasiýasy bolsa has tebigy bolar. Täzeligi häzir synap görmek isleseňiz, Android 17-niň beta wersiýasy öňünden synag maksatnamasy arkaly Pixel enjamlarynyň eýeleri üçin eýýäm elýeterlidir.
ORIENT
