Hytaýda Ýylkyň ýylynyň başlanmagy mynasybetli ajaýyp dabaralar geçirilýär
Şu ýyl Bahar baýramy, ýa-da Hytaýyň Täze ýyly, sişenbe gününe gabat gelýär we Hytaýyň iň möhüm baýramçylygy bolup, maşgala duşuşyklary, baýramçylyk tagamlary we Täze ýyl arzuwlary bilen bellenilýär. Resmi dynç günleri dokuz gün, ýagny 15-23-nji fewral aralygynda dowam edýär.
Pekiniň Taorantin seýilgähinde ýörite Täze ýyl bagçylyk dabarasy baýramçylyk bezegleri, milli tagamlar, döredijilik harytlary we halk döredijilik çykyşlary bilen köp adamy özüne çekdi.
Hytaýyň demirgazyk-günbataryndaky Şensi welaýatynyň Ýulin şäherinde tutuş ýurt boýunça 30-dan gowrak Ýange halk tans topary deprekler, gonglar we pasyrdaýan gyzyl lentalar bilen çykyş edip, täze ýyla baýramçylyk arzuwlaryny sowgat etdiler.
Hytaýyň gündogaryndaky Çžeszýan welaýatynyň Huçžou şäherinde gözel ýerlerde 8000-den gowrak tomaşa görkezilýär, bu bolsa baýram wagtynda myhmanlaryň medeni tejribesini baýlaşdyrýar.
Hubeý we Fuszýan welaýatlarynda robotlar we wirtual hakykat ýaly öňdebaryjy tehnologiýalar adaty baýramçylyk çärelerine goşulyp, adamlara özboluşly tejribe hödürleýär. Janly aktýorlaryň we robotlaryň gatnaşmagyndaky tans çykyşlary maddy däl medeni mirasa täze öwüşgin berdi.
"Robot elementleriniň milli hytaý medeniýetine goşulmagy, hytaý däpleriniň asyl baýramçylyk ruhuny saklamak bilen birlikde innowasiýalary getirýär. Bu hakykatdanam Bahar baýramynyň ruhuny döredýär" - diýip, taýwanly syýahatçy Ýan Minsýun aýtdy.
Hytaýyň demirgazygyndaky Hebeý welaýatynyň Tanşan şäherinde ajaýyp çyralar toplumy gijeki asmany ýagtyldýar, eredilen demirden ýasalan feýerwerkler, at çykyşlary we akrobatika görkezilişleri milli baýramçylygyň özboluşly ajaýyplygyny has-da artdyrýar.
Hytaýyň gündogaryndaky Şandun welaýatynyň Linsin şäheriniň ýaşaýjylary hem derýanyň boýunda ajaýyp çyra dabarasyny synlap, Hytaýyň Täze ýylyny garşyladylar.
Gonkongda we Makaoda dowam edýän baýramçylyk wagtynda syýahatçylaryň sany köpelýär: 15-20-nji fewral aralygynda olaryň sany degişlilikde 1,16 milliondan we 998 000-den geçdi.
