Moskwanyň metrosynda Bahar baýramyna bagyşlanan tematik otly hereket edip başlady
Sişenbe güni Moskwada Bahar baýramyna ýa-da Hytaý Täze ýylyna bagyşlanan tematik metro otlysy hereket edip başlady. Taslama rus paýtagtynyň ýaşaýjylaryny we myhmanlaryny milli hytaý medeniýeti bilen tanyşdyrmaga gönükdirilendir.
Otly hytaý däbinde bagt, şatlyk, üstünlik we abadançylygy alamatlandyrýan gyzyl reňklerde bezelendir. Wagonlar gündogar senenamasyna görä Ýylky ýylynyň nyşany bolan atyň şekili bilen bezelendir. Içerde ýolagçylar Bahar baýramy barada hytaý we rus dillerinde gadymy şygyryýeti, Hytaýyň milli medeniýetiniň şekillerini, şeýle hem täze ýyl baýramçylyklarynyň suratlaryny syn edip bilerler.
Açylyş dabarasynda Hytaýyň Russiýadaky ilçisi Çžan Hanhueý, Russiýanyň Daşary işler ministrliginiň resmi wekili Mariýa Zaharowa we Moskwanyň häkiminiň orunbasary Maksim Liksutow gatnaşdylar.
Dabarada çykyş eden Mariýa Zaharowa başlangyjyň medeni alyş-çalyşy ösdürmekdäki ähmiýetini nygtady. Onuň aýtmagyna görä, moskwaly ýaşaýjylar bu taslamany gyzgyn garşylaýarlar, sebäbi ol aýratyn baýramçylyk ýagdaýyny döredýär. Ol wagonlaryň bezeginiň ýolagçylara Aziýa halklary, esasanam hytaýlylar üçin uly ähmiýete eýe bolan Bahar baýramynyň ruhuny has çuňňur duýmaga mümkinçilik berýändigini belledi. Zaharowa Hytaýda her ýyl bir milliardardan gowrak adamyň däp bolan Täze ýyly belleýändigini ýatlatdy we şuňa meňzeş medeni taslamalaryň ýurtlaryň arasyndaky özara düşünişmegi berkitmäge ýardam edýändigini nygtady.
