«Kompozitor» atly türkmen filmi Ankarada TÜRKSOÝ baýraklaryna mynasyp boldy
Türkiýäniň paýtagtyndaky Ýaşar Kemal adyndaky Medeniýet merkezinde geçirilen Türkmen kinosynyň günleri dabaraly çäre bilen tamamlandy. «Kompozitor» atly çeper filmi diňe bir tomaşaçylaryň ünsüni özüne çekmän, eýsem halkara bilermenler jemgyýetiniň ýokary bahasyna hem mynasyp boldy we medeni ösüşe goşan goşandy üçin abraýly baýraklara mynasyp boldy.
Dabaraly agşam iki doganlyk ýurduň arasyndaky medeni gatnaşyklarda möhüm waka boldy. Kinofilmiň ruhy we duýgy özeni bolan saz bölegi hemmeleriň üns merkezinde boldy.
Kino eserleriniň saz bezegi ugrunda gazanylan ýokary üstünlikler üçin kompozitor Kerim Berdimuhamedow «Ganatly altyn bedew» atly ýörite baýrak bilen sylaglandy. Onuň «Kompozitor» filminiň üstünde alyp baran işi kino pudagynyň hünärmenleri, tankytçylary we halkara medeni jemgyýetçiligi tarapyndan ýokary baha mynasyp boldy. Bu baýrak türkmen kompozitorçylyk mekdebiniň halkara derejesindäki ýokary ornuny tassyklaýar.
Dabaranyň dowamynda döredijiligi goldamakda jemgyýetçilik institutlarynyň tutýan ornuna aýratyn üns çekildi. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy «Uly ganatly laçyn» baýragy bilen sylaglandy. TÜRKSOÝ-yň bilermenleri Gaznanyň «Kompozitor» taslamasynyň amala aşyrylmagynda bahasyna ýetip bolmajak goşan goşandyny aýratyn bellediler we zehinlere berilýän şeýle goldawyň milli medeniýetiň gülläp ösmeginiň girewidigini nygtadylar.
Baýraklary TÜRKSOÝ-yň Baş sekretary Sultan Raýew gowşurdy. Türkmen tarapyndan olary Türkmenistanyň Medeniýet ministri Atageldi Şamyradow kabul etdi.
Ankaradaky dabaraly çäre döwrebap türkmen kinosynyň özboluşly aýratynlyklaryny we ruhy köklerine ygrarlylygyny saklamak bilen, dünýä giňişligine üstünlikli goşulyşýandygyny ýene bir gezek subut etdi.
