Aşgabatda türk eksporty 100-den gowrak kompaniýany hödürleýär
Türkmenistanyň Söwda-senagat edarasynyň sergi zalynda Türkiýe Respublikasynyň eksport harytlarynyň sergisi guraldy: 100-den gowrak öňdebaryjy kompaniýa öz önümlerini, täze çözgütlerini we senagat ösüşi üçin taýýarlanan taslamalary Aşgabada getirdi. Serginiň açylyşynda Türkiýäniň Söwda ministri Ömer Bolat hem gatnaşdy.
Diwarlyklarda — dürli pudaklar we “akylly” şäherler üçin ýokary tehnologiýalar görkezilýär. Aýratyn üns — energetika ulgamyna berilýär. Üns merkezinde diňe adaty kuwwatlyklar däl, eýsem energiýa tygşytlaýyş ulgamlary we gaýtadan dikeldilýän energiýa çeşmeleri hem boldy. Bu tehnologiýalar ykdysadyýeti “ýaşyl” we netijeli saklamaga mümkinçilik berýär.
Sergide oba hojalyk pudagy geljegiň nusgalaryny görkezýän meýdança öwrüldi. Myhmanlar ýyladyşhanalary dolandyrmagyň awtomatlaşdyrylan ulgamlaryny öwrenýän bolsalar, telekeçiler damjalaýyn suwaryş üçin niýetlenen türk enjamlaryny ornaşdyrmagyň ýagdaýlaryny maslahatlaşýarlar. Şol ýerde, edil goňşy diwarlykda bolsa, azyk senagaty taýýar iýmit önümlerinden başlap, ýokary tehnologiýaly gaplaýyş ugurlaryna çenli tutuş önümçilik tapgyryny görkezýär.
Söwda-senagat edarasynyň meýdançasynda logistika kompaniýalary we Türkiýäniň öňdebaryjy uniwersitetleri hem öz diwarlyklarynyn gurnadylar.
Gyzykly ýeri: türk kompaniýalary diňe bir enjamlary satmaga däl, eýsem türkmen hünärmenlerine şol enjamlarda işlemegi öwretmäge hem hem taýýar. Serginiň çäginde okuw maslahatlaryny guramak we bilelikdäki önümçilikleri ýola goýmak barada eýýäm çekişmeler alnyp barylýar.
Sergi 12-nji fewrala çenli dowam edip, täze şertnamalary, häzirki zaman maşynlary ýa-da halkara derejesindäki bilim programmalaryny gözleýänleriň ünsüni özüne çekýär.
