OpenAI 100 milliard dollar maýa çekmegi meýilleşdirýär: maýadarlaryň arasynda Nvidia, Microsoft we Amazon bar
ChatGPT-niň döredijisi bolan OpenAI kompaniýasy maýa çekmegiň uly möçberli tapgyryna başlady. Kompaniýanyň maksady — işewürligini giňeltmek we infrastrukturasyny ösdürmek üçin 100 milliard dollara çenli maýa toplamak. Eger bu geleşik amala aşsa, OpenAI kompaniýasynyň umumy bazar bahasy 750 milliard dollara çenli ýokarlanyp biler.
Esasy maýadarlar hökmünde iri tehnologiýa korporasiýalary çykyş edip biler. Çeşmeleriň maglumatlaryna görä, Nvidia korporasiýasy 20 milliard dollar möçberinde maýa goýmagy göz öňünde tutýar. Microsoft we Amazon kompaniýalarynyň bolsa hersiniň 10 milliard dollardan maýa goýmagy ähtimal.
Amazon üçin bu geleşik OpenAI bilen hyzmatdaşlygyň giňeldilmeginiň bir bölegi bolup biler. Bu hyzmatdaşlyk kompaniýa bulut infrastrukturasyny ulanmagyň öwezine OpenAI-niň tehnologiýalaryna elýeterlilik açar. Nvidia bolsa öz gezeginde öňki ylalaşyklaryň şertlerini gaýtadan gözden geçirip, emeli aňy öwretmek üçin täze maglumat merkezleriniň işe girizilmegini tizleşdirip biler.
OpenAI şeýle hem Abu-Dabiniň iri döwlet maýa gaznalary — ADIA we MGX bilen gepleşikler geçirýär. Mundan başga-da, kompaniýa emeli aň pudagynda paýyny işjeň artdyrýan ýapon holdingi SoftBank-dan 30 milliard dollar almaga ýakynlaşýar. Ýatladyp geçsek, SoftBank geçen aý OpenAI kompaniýasyna eýýäm 22,5 milliard dollar maýa goýupdy.
Şeýle uly möçberli maýa akymy emeli aň ulgamyndaky bäsdeşligiň täze derejä çykýandygyny tassyklaýar. OpenAI üçin bu serişdeler geljekki emeli aň modelleri üçin esas boljak iň güýçli hasaplaýyş merkezlerini döretmek maksady bilen zerur bolup durýar. Maýadarlar üçin bolsa bu, soňky onýyllygyň iň çalt ösýän pudagynda öz orunlaryny berkitmek üçin mümkinçilikdir.
ORIENT
