Eýran Türkmenistana 495 million dollar möçberinde nebit däl önümleri eksport etdi
Häzirki eýran ýylynyň ilkinji 9 aýynda (2025-nji ýylyň 20-nji martyndan 21-nji dekabryna çenli) Eýranyň Türkmenistana nebit däl önümleriniň eksporty geçen eýran ýylynyň degişli döwri bilen (2024-nji ýylyň 21-nji martyndan 20-nji dekabryna çenli) deňeşdirilende, gymmatlaýyn hasapda 22,5 göterim, agram boýunça bolsa 3 göterim artdy.
Trend agentliginiň Eýranyň Gümrük administrasiýasynyň statistikasyna salgylanyp habar bermegine görä, görkezilen dokuz aýlyk döwürde Eýranyň Türkmenistana eksport edilen nebit däl önümleriň möçberi takmynan 495 million dollar we 1,18 million tonna boldy.
Geçen eýran ýylynyň degişli döwründe bu görkeziji 404 million dollar we 1,15 million tonna barabardy.
Eksportyň düzümine oba hojalyk we azyk önümleri, senagat harytlary, transformatorlar, suw bilen sowadylýan kondisionerler, nebit-himiýa önümleri we beýleki harytlar girýär.
Mundan başga-da, häzirki eýran ýylynyň ilkinji 9 aýynda Eýran bilen Türkmenistanyň arasyndaky haryt dolanyşygy takmynan 504 million dollar we 1,19 million tonna boldy. Bu görkeziji geçen ýylyň degişli döwri bilen deňeşdirilende, gymmatlaýyn hasapda 19,9 göterim, agram boýunça bolsa 2,2 göterim ösüşi aňladýar.
Şeýle hem bellenilişine görä, häzirki eýran ýylynyň ilkinji 9 aýynda Eýranyň umumy eksporty 41,2 milliard dollar we takmynan 119 million tonna boldy.
