Türkmenistan “2028-nji — Halkara hukugyň ýylyna” taýýarlyk işlerine başlaýar
Aşgabat, 30-njy ýanwar | ORIENT. Anna güni geçirilen Hökümet mejlisinde Türkmenistanyň DIM-niň ýolbaşçysy Raşid Meredow 2028-nji ýyla taýýarlyk görmek boýunça çäreleriň meýilnamasy barada giňişleýin hasabat berdi. Bu ýyly “Halkara hukugyň ýyly” diýip yglan etmek baradaky başlangyç Prezident Serdar Berdimuhamedow tarapyndan öňe sürüldi. Ilkinji gezek BMG-niň Baş Assambleýasynyň 80-nji sessiýasynda teklip edilen bu başlangyç häzirki zaman halkara gatnaşyklarynyň hukuk binýadyny berkitmegi maksat edinýär.
BMG bilen strategiki hyzmatdaşlyk. Aşgabat bu başlangyjy durmuşa geçirmek boýunça esasy hyzmatdaş hökmünde BMG-niň Sekretariatynyň Hukuk meseleleri boýunça müdirligini kesgitledi. Iş prosesi BMG-niň Baş Assambleýasynyň sessiýasynda Kararnamanyň taslamasynyň hödürlenmegini we « Halkara hukuk we Türkmenistanyň Bitaraplygy» atly Milli konsepsiýanyň işlenip taýýarlanylmagyny öz içine alar.
Hukuk sowatlylygy: orta mekdeplerden BMG-niň münberine çenli. Meýilnamanyň özboluşlylygy onuň diňe bir diplomatlara däl-de, eýsem ýaş nesle hem gönükdirilmegindedir. Türkmenistan giň gerimli bilim maksatly çäresini meýilleşdirýär.
Ýokary okuw we orta mekdeplerde BMG-niň bilermenleriniň gatnaşmagynda halkara hukugy boýunça ýörite kurslar geçiriler.
Ýaşlaryň arasynda zehinli halkara hukukçylary ýüze çykarmaga gönükdirilen ylmy işler we esse bäsleşikleri guralar.
Maglumat gurşawy: DIM-iň web saýtynda ýöriteleşdirilen maglumat bölümi peýda bolar, onda halkara-hukuk tematikasy boýunça maglumat beriji materiallary taýýarlamak we ýaýratmak göz öňünde tutulýar.
Türkmenistanyň 2028-nji ýyl boýunça başlangyjy — bu bitaraplyk syýasatyny hukuk nukdaýnazaryndan institusionallaşdyrmak synanyşygy bolup durýar. Türkmenistan howpsuzlygyň öňki arhitekturasynyň sarsgynlara sezewar bolýan şertlerinde dünýä jemgyýetçiligine esasy «oýun düzgünlerine» gaýdyp gelmegi teklip edýär. Ählumumy durnuksyzlygyň şertlerinde Aşgabat BMG-niň Tertipnamasyna we halkara konwensiýalara berk eýermekligiň ynam çökgünliginden çykmagyň ýeke-täk ýoludygyny ýatladyp, «hukuk daýanjy» hökmünde çykyş edýär.
