Awaza maksatnamasy YHG-nyň giňişliginde amaly taýdan durmuşa geçirmek tapgyryna geçýär
Aşgabat – Tähran | ORIENT. Şu hepde Tähranda Ykdysady Hyzmatdaşlyk Guramasynyň (YHG) Hemişelik wekilleriniň Geňeşiniň mejlisi geçirildi. Bu mejlis möhüm bir ýagdaýy berkitdi: Türkmenistanyň öňe sürýän başlangyçlary sebit boýunça uzak möhletleýin ugur hökmünde kabul edilýär.
Ara alyp maslahatlaşmalaryň esasy temasy 2024-2034-nji ýyllar üçin Hereketleriň Awaza maksatnamasy boldy. Belläp geçmek möhümdir, ozal Aşgabat tarapyndan teklip edilen bu maksatnamanyň üçünji ileri tutulýan ugry ählumumy derejesindäki resminama — öňümizdäki döwürde kabul edilmegi meýilleşdirilýän «Ykdysady hyzmatdaşlygyň strategik maksatlary – 2035» atly resminamasynyň taslamasyna girizildi.
Ulag — №1 ileri tutulýan ugur. YHG-nyň Maksatnamanyň üçünji ileri tutulýan ugruny durmuşa geçirmek boýunça taslamany hödürledi — « Üstaşyr, ulag we özara baglanyşyk». Bu taslama sebitde bökdençsiz logistika geçelgelerini döretmegi göz öňünde tutýar. YHG-nyň ähli agza döwletleriniň bu ugry goldamagy Türkmenistanyň dünýä okeanyna çykalgasy bolmadyk ýurtlar üçin zerur bolan integrasiýa nusgasyny teklip edendigini tassyklaýar.
Dünýä giňişliginde LLDC ýurtlarynyň sesi. Mejlise gatnaşyjylara BMG-niň Deňze çykalgasy bolmadyk ösüp barýan döwletler boýunça üçünji maslahatynyň çäklerinde « 2024-2034-nji ýyllar üçin Hereketleriň Awaza maksatnamasy we YHG sebiti» atly tamasy boýunça ýerine ýetirilen işler hem-de geljek döwür üçin meýilleşdirilýän ädimler barada maglumat berildi. Şeýlelikde, sebit başlangyjy durnukly ulag boýunça dünýä gün tertibiniň bir bölegine öwrülip, halkara derejesinde giň mümkinçiliklere eýe bolýar.
Maglumat aç-açanlygy. Möhüm we simwoliki ädim hökmünde YHG-nyň resmi internet portalynda «AWAZA Programme of Action 2024-2034 and the ECO Region» atly ýörite bölüm döredildi. Indi ýakyn on ýyl üçin sebit ösüşiniň ýol kartasy maýa goýujylar we halkara hyzmatdaşlar üçin onlaýn görnüşde elýeterlidir.
Bilermeniň pikiri:Türkmenistanyň YHG-däki Hemişelik wekili Ylýas Gaýypow Awaza maksatnamasynyň amala aşyrylmagyna ähli taraplaryň işjeň gatnaşmagynyň ony milli taslamadan bilelikdäki üstünlik strategiýasyna öwürýändigini belledi. Aziýa bilen Ýewropanyň arasyndaky ýollaryň çatrygynda ýerleşýän sebit üçin şeýle «özara baglanyşyk» — ykdysady abadançylyga eltýän ýeke-täk ýol bolup durýar.
