Tesla köpçülikleýin satuwlara taýýarlanýar: Optimus robotlary 2027-nji ýyla çenli bazara çykarylar
Ilon Mask adam şekilli Optimus robotlaryny öndürmek boýunça uly meýilnamalary yglan etdi. Tesla kompaniýasynyň ýolbaşçysynyň bellemegine görä, kompaniýa gumanoid robotlaryň açyk satuwlaryna 2027-nji ýylyň ahyryna çenli başlamakçy. Häzirki wagtda prototipler kompaniýanyň zawodlarynda ýönekeý amallary ýerine ýetirip, «meýdan synaglaryndan» geçirilýär.
Şu ýylyň ahyryna çenli robotlaryň has çylşyrymly önümçilik wezipelerini ýerine ýetirip başlamagyna garaşylýar. 2021-nji ýylda ilkinji gezek hödürlenen taslama konseptden başlap, çylşyrymly adam hereketlerini gaýtalap bilýän işleýän nusgalara çenli ösüş ýoluny geçdi. Soňky bir ýylyň dowamynda Optimus önümçilikdäki esasy manipulýasiýalardan başlap, kung-fu elementleri bilen görkezme çykyşlaryna çenli dürli ugurlarda öz mümkinçiliklerini görkezdi.
Maskyň esasy maksatlarynyň biri köpçülikleýin önüm döretmekdir. Bir robotyň çaklanylýan bahasy 20 müňden 30 müň amerikan dollaryna çenli bolar. Tesla kompaniýasynyň ýolbaşçysy şeýle baha arkaly enjamyň giň sarp edijiler üçin elýeterli boljakdygyny we öý hojalygynda hem-de işewürlikde aýrylmaz kömekçä öwrüljekdigini nygtaýar.
Optimus robotlarynyň bazara çykarylmagy zähmeti awtomatlaşdyrmaga bolan çemeleşmäni düýpgöter üýtgedip biler. Robotlar adaty we howply işleri öz üstüne alyp, önümçiligiň umumy netijeliligini artdyryp hem-de adamlary agyr fiziki işlerden boşadyp biler.
ORIENT
