Hytaý ykdysadyýetine ynam artýar, dünýäniň maýadarlary ösüşi çaklaýarlar
2025-nji ýylda Hytaýyň ykdysadyýeti durnukly ösüş depginini saklamak bilen, jemi içerki önümiň möçberi 140 trillion ýuandan geçdi we meýilleşdirilen 5 göterim ýyllyk ösüş ýerine ýetirildi. Resmi taýdan ykdysadyýetiň esasy binýadynyň durnuklydygy bellendi.
Hytaý döwleti dünýäde iň uly we doly önümçilik ulgamyny saklamak bilen, goşmaça gymmat boýunça önümçilikde bassyr 16 ýyl bäri dünýäde öňdeligi saklap gelýär. Hyzmatlar pudagy jemi içerki önümiň 57.7 göterimini düzýär we ol dünýäde iň uly sanly infrastruktura – giň zolakly ulgamlar we internet-kompýuter hasaplaýyş tehnologiýalary bilen alnyp barylýar. Daşary söwda boýunça 2025-nji ýylda import we eksport möçberi 45 trillion 470 milliard ýuana ýetip, dokuz ýyl bäri yzygiderli ösüş gazanyldy. Hytaý häzirki wagtda dünýäniň 240-dan gowrak ýurtlary we sebitleri bilen söwda gatnaşyklaryny alyp barýar, olaryň takmynan ýarysy “Bir guşak – bir ýol” başlangyjynyň çägindäki hyzmatdaş ýurtlara degişlidir.
Innowasiýa ösüşiň esasy hereketlendiriji güýjüne öwrülip, ylmy-barlag işlerine we ösüş tagallalaryna goýulýan serişdeler Ykdysady Hyzmatdaşlyk we Ösüş Guramasyna agza ýurtlarynyň ortaça derejesinden ýokary boldy. Bu ýagdaý ösüşiň innowasiýa esasly täze tapgyra geçýändigini görkezýär. Sarp edijilik bazary işjeňleşip, şaý-sepleriň, döwrebap telefonlaryň we artykmaç islegleri kanagatlandyrýan harytlaryň satuwy artýar.
Dünýäniň maýadarlary bu ösüşe oňyn baha berýärler. Goldman Sachs kompaniýasy 2026-njy ýylyň ahyryna çenli MSCI Hytaý indeksiniň 20 göterim ýokarlanmagyny çaklaýar. CSI 300 indeksiniň bolsa 12 göterim ýokarlanyp, 5200 derejä ýetmegi çak edilýär. Bu bolsa Hytaýyň ykdysadyýetiniň uzak möhletleýin durnuklylygyna, düzüm-gurluşy boýunça täzelenmegine hem-de onuň ösüşiniň mümkinçiliklerine bolan ýokary ynamy görkezýändir.
