Apple programma üpjünçiligindäki möhüm kemçilikleri üçin 5 million dollara çenli tölemäge taýýar
Amerikanyň Apple tehnologik kompaniýasy özüniň "Bug Bounty" kemçilikleri tapmak programmasyndaky iň ýokary baýrak möçberini ep-esli artdyrdy. Indi programma üpjünçiligindäki (PÜ) möhüm kemçilikleri tapan ulanyjylara berilýän iň ýokary töleg 2 million dollara ýetdi. Şol bir wagtda bir gözlegçi goşmaça baýraklar hem göz öňünde tutulanda jemi 5 million dollara çenli alyp bilmegi mümkin.
Apple kompaniýasynyň howpsuzlyk meseleleri boýunça wise-prezidenti Ivan Krstiç Wired neşiri bilen geçiren söhbetdeşliginde şeýle ýokary baýragyň maksadynyň ökde gözlegçileri höweslendirmekdigini aýtdy. Kompaniýa iň çylşyrymly meseleler, esasanam içaly programma üpjünçiligi arkaly amala aşyrylyp bilinýän hüjümler üçin ulanylyp bilinjek kemçilikler üçin millionlap dollar tölemäge taýýar.
Goşmaça baýraklar aşakdakylar üçin berilýär:
• Täze programma üpjünçiliginiň beta synaglarynda howpsuzlyk meseleleriniň ýüze çykarylmagy.
• Operasion ulgamda howpsuzlygy üpjün etmek maksady bilen mümkinçilikleri çäklendirýän "Lockdown Mode" ulgamyny doly aýlap geçmäge mümkinçilik berýän kemçilikleriň tapylmagy.
Bu başlangyç, mobil önümleri ýokary gorag derejesi bilen tanalýan Apple kompaniýasy üçin kemçilikleriň nähili möhüm ähmiýete eýedigini görkezýär.
Howpsuzlyk meselelerini ýüze çykarmak boýunça baýrak maksatnamasy 2016-njy ýylda iň ýokary 200 müň dollarlyk möçber bilen başlady. 2019-njy ýylda baýragyň möçberi 1 million dollara, indi bolsa 2 million dollara ýetdi. 2020-nji ýyldan bäri maksatnama ähli ulanyjylara açyk görnüşde işleýär we Apple şu wagta çenli tapylan kemçilikler üçin 35 million dollardan gowrak pul töläpdir.
ORIENT
