TDIM-niň Halkara gatnaşyklary institutynda täze okuw ýylynyň başy: geljekki diplomatlara — ak ýol!
Türkmenistanyň DIM-niň Halkara gatnaşyklary institutynda Bilimler güni dabaraly ýagdaýda geçirildi. Institutyň esasy meýdançasynda birinji ýyl talyplaryna akademiki durmuşlarynyň täze tapgyrynyň başlanýandygyny alamatlandyrýan nyşanlyk açarlar we talyp şahadatnamalary gowşuryldy.
DIM-niň HGI-ne tötänleýin girilmeýär: birinji ýyl talyplarynyň arasynda milli we halkara olimpiadalarynyň, bäsleşikleriniň ýeňijileri, maksada okgunly zehinli ýaşlar bar. Hut şeýle talyplar geljekde diplomat, halkara žurnalist hem-de ykdysady we hukuk ugurlarynda ekspert bolýarlar.
Institutda okuw prosesi nazary taýýarlygyň hem-de amaly başarnyklaryň utgaşdyrylmagy arkaly alnyp barylýar. Mugallymlar — halkara arenasynda işjeň çykyş edýän tejribeli diplomatlar, žurnalistler we hünärmenlerdir. Talyplar daşary ýurt ilçileri we çagyrylan lektorlar bilen yzygiderli duşuşýarlar, dünýä syýasaty we halkara aragatnaşyklary barada döwrebap maglumat alýarlar, amaly taslamalara we gepleşikleriň simulýasiýalaryna gatnaşýarlar.
Institutda «Halkara gatnaşyklary», «Halkara hukugy», «Halkara ykdysadyýeti», «Syýasy kommunikasiýa we internet-žurnalistika», «Sanly diplomatiýa» we beýleki döwrüň talaplaryna laýyk bolan ugurlar boýunça bakalawrlar we magistrler taýýarlanýar. Şeýle çemeleşme ýokary derejeli taýýarlygy üpjün edýär we uçurymlara ýurdumyzyň döwlet edaralarynda hem-de halkara guramalarynda üstünlikli işläp bilmäge mümkinçilik berýär.
Institut halkara hyzmatdaşlygyny we ýaş hünärmenleriň amaly taýýarlygyny ösdürmegi dowam etdirýär: soňky ýyllarda ýüzlerçe talyp daşary ýurtlardaky diplomatik wekilhanalarda we halkara guramalarynda tejribe geçdiler. Okuw meýilnamasyndaky täze başlangyçlar talyplara ýurduň daşary syýasat ugruny durmuşa geçirmäge we onuň metbugat meýdanyny kemala getirmäge işjeň gatnaşmaga mümkinçilik berýär.
Bilimler güni diňe bir täze okuw ýylynyň başlangyjy bolman, eýsem Türkmenistanyň DIM-niň Halkara gatnaşyklary institutynyň ýurdumyzyň halkara abraýyny berkitmäge hem-de daşary syýasat başlangyçlaryny ösdürmäge taýýar zehinli ýaşlary özüne çekýän merkez bolup galýandygyny hem görkezdi.
ORIENT
