Sanly geljegi bilelikde döretmek: mekdep okuwçylarynyň arasynda halkara IT-olimpiadasy başlandy
Russiýada mekdep okuwçylarynyň arasynda halkara IT-olimpiadasy başlady. Bu bäsleşige dünýäniň islendik ýurdunyň, şol sanda Türkmenistanyň hem 14–18 ýaş aralygyndaky ýokary synp okuwçylary gatnaşyp bilerler, hatda olaryň programma üpjünçiligi boýunça taýýarlygy bolmasa-da. Olimpiada RF hökümetiniň goldawy bilen, Nižegorodskaýa welaýatynyň hökümeti tarapyndan gurnaldy. Baş hyzmatdaş hökmünde Sberbank çykyş edýär. Bu halkara çärä gatnaşmak üçin 18-nji aprele çenli hasaba durup bolar. Olimpiadanyň başynda her bir gatnaşyjy öz IT bilim derejesini barlamak üçin synagdan geçip, netijesi boýunça şahadatnama alyp biler. Bu tapgyryň esasy ugurlary – maglumat howpsuzlygy, matematiki logika, algoritmleşdirmek we programma düzmegiň esaslary, maglumatlary seljermek, teksti işlemek we emeli aň (EA) esasynda ýönekeý modelleri döretmek bolup durýar diýip, Sberiň metbugat gullugyna salgylanyp TASS habar berýär.
23–25-nji aprel aralygynda bäsleşigiň ikinji tapgyry – Capture the Flag görnüşindäki toparlaýyn ýarym final geçiriler. Birinji tapgyry üstünlikli geçenleriň arasynda düzülýän bäş adamlyk toparlar ýarym finala çykarlar. Bu tapgyrda beriljek meseleleriň temalary: emeli aň we maşyn öwrenmesi, kriptoanaliz, rewers inženerçilik, web-gowşaklyklary, kompýuter forenzikasy (kompýuter-kriminalistika), algoritmik programma düzmek. Iň köp utuk toplan 100 gatnaşyjy jemleýji tapgyra gatnaşar. Olimpiadanyň meseleleri bilim berýän “Algoritmika” platformasynda ýerine ýetiriler, bu platforma çäräniň tehnologik hyzmatdaşydyr.
Jemleýji tapgyr 30-njy maýdan 3-nji iýuna çenli Nižegorodskaýa welaýatynyň “21-nji mekdebiň” kampusynda geçiriler. Ýeňijileri sylaglamak dabarasy iýun aýynda Nižegorodskaýa welaýatynda halkara “Russiýanyň senagatynyň sanly pudagy” atly ýyllyk maslahatynyň çäklerinde geçiriler. Olimpiadanyň resmi sahypasy: https://goit.space.
Sberyň ýolbaşçysy German Grefiň sözlerine görä, maglumat tehnologiýalary dünýäni başgaça görmäge we çylşyrymly prosesleri baglanyşdyrmaga mümkinçilik berýär. Häzirki wagtda okuwçylar iň gyzykly döwürde ýaşaýarlar we adamzadyň arzuwlaryny amala aşyrmaga mümkinçilikleri bar. RF Ministrler Kabinetiniň Başlygynyň orunbasary Dmitriý Grigorenko güýçli IT-kadrlaryň bütin dünýä üçin örän möhüm bolup durýandygyny we gatnaşyjylaryň bu ugura bolan ýokary gyzyklanmasyny belledi. Nižegorodskaýa welaýatynyň gubernatory Gleb Nikitin bolsa, olimpiadanyň dürli ýurtlardan zehinli ýaşlary birleşdirýändigini we olaryň bilelikde sanly geljegi döretmäge ýardam berýändigini aýtdy. Dünýäniň dürli künjeklerinden gatnaşýan okuwçylar diňe bir şahsy ösüşe däl, eýsem tehnologik liderleriň halkara jemgyýetini döretmäge hem maýa goýýarlar.
