“Altyn asyryň altyn zehinleri” ders bäsleşiginiň döwlet tapgyrynda ýeňiji bolan okuwçylar sylaglandy
3-nji aprelde Aşgabat şäheriniň ýöriteleşdirilen 4-nji orta mekdebinde mekdep okuwçylarynyň arasynda geçirilýän “Altyn asyryň altyn zehinleri” ders bäsleşiginiň döwlet tapgyrynda ýeňiji bolan okuwçylary, şeýle hem robot tehnikasy boýunça bäsleşigiň döwlet tapgyrynyň ýeňijilerini Türkmenistanyň Bilim ministrliginiň diplomlary we Türkmenistanyň Senagatçylar we telekeçiler partiýasynyň gymmat bahaly sowgatlary bilen sylaglamak dabarasy geçirildi.
2024-2025-nji okuw ýylynda ýurdumyzyň mekdep okuwçylarynyň arasynda yglan edilen "Altyn asyryň altyn zehinleri" atly bäsleşikleriň çäginde 2025-nji ýylyň 11-14-nji martynda 11-12-ni synp okuwçylarynyň arasynda okuw dersleri boýunça ders bäsleşikleriniň döwlet tapgyryna Aşgabat, Arkadag şäherinden we welaýatlardan jemi 811 okuwçy gatnaşdy.
“Altyn asyryň altyn zehinleri” atly bäsleşikleri geçirmegiň Düzgünnamasyna laýyklykda jemi 236 okuwçy I,II,III orunlara (I orun-34 sany II orun-68 sany III orun-134 sany) mynasyp boldular. Geçen ýyllardakydan tapawutlylykda bu ýyl ders bäsleşikleriniň döwlet tapgyry onlaýn görnüşinde däl-de Aşgabat şäheriniň we welaýatlaryň ýokary we orta hünär okuw mekdeplerinde geçirildi.
Şeýle-de ders bäsleşiklerine gatnaşan okuwçylar bilen ýokary we orta hünär okuw mekdeplerinde hünäre ugrukdyryş işleri hem geçirildi.
ORIENT news
