Ýokary synp mekdep okuwçylarynyň arasynda çeper-döredijilik bäsleşigi guraldy
19-njy martda şu ýylyň dowamynda umumybilim berýän mekdepler bilen bilelikde geçiriljek çäreleriň meýilnamasy esasynda, S.A.Nyýazow adyndaky Türkmen oba hojalyk uniwersitetiniň Ýaş alymlar Geňeşiniň, «Ýaş agroekolog», «Ýaş agrohimik», «Ussat agronom» ylmy gurnaklarynyň guramaklarynda Aşgabat şäheriniň orta mekdepleriniň ýokary synp okuwçylarynyň arasynda «Gül-gunçaly Diýarym!» atly çeper-döredijilik bäsleşigi geçirildi.
Bu bäsleşige orta mekdepleriň 3 okuwçydan ybarat toparlary gatnaşyp, olar ýurdumyzyň gözel tebigatyny, onuň milli baýlyklaryny, haýwanat we ösümlik dünýäsini gorap saklamak hem-de olardan rejeli peýdalanmak barada öz düşünjelerini çeper beýan etdiler. Şeýle-de toparlar ýurdumyzda ösýän ösümlikleriň tohumlaryndan tebigatyň gözel keşbini hem-de owadan gülleriň şekillerini mozaikada şekillendirdiler.
Ýeňiji bolan ýaşlara I, II, III derejeli diplomlar we uniwersitetiň rektorlygy tarapyndan sowgatlar gowşuryldy.
ORIENT
