Türkmenistanyň ÝOM-niň talyplarynyň arasynda goşgy düzmek bäsleşigi geçirilýär
2025-nji ýylyň şygarynyň “Halkara parahatçylyk we ynanyşmak ýyly” diýlip atlandyrylmagy hem-de Garaşsyz Türkmenistanyň hemişelik Bitaraplygynyň 30 ýyllygy mynasybetli meýilleşdirilen çäreleriň çäginde Türkmen döwlet medeniýet institutynda ýokary okuw mekdepleriň talyplarynyň arasynda ýurdumyzda gazanylýan ösüşleri, halkymyzyň parahatçylyk, ynanyşmak, dostluk-doganlyk, zähmetsöýerlik ýörelgelerini wasp edýän goşgulary döretmek boýunça “Ýaşasyn parahat durmuş – Gahryman Arkadagymyzyň köňül kelamy” atly goşgy düzmek bäsleşigi geçirilýär.
Bäsleşik geçirilmezinden azyndan 7 gün öň, ýokary okuw mekdeplerinden oňa gatnaşjak talyp barada maglumaty beýan edýän hat Türkmen döwlet medeniýet institutyna ugradylmaly (hatda: jemleýji tapgyra gatnaşýan talybyň familiýasy, ady, atasynyň ady, okaýan fakulteti, hünäri we ýyly, çykyşynyň ýagny, bäsleşige hödürleýän öz goşgusynyň hem-de çeper okaýyş boýunça hödürleýän goşgusynyň atlary görkezilmeli).
Düzgünnama laýyklykda, 5 bentden az bolmadyk türkmen dilinde öz döreden goşgusyny many-mazmuny, çeperçiligi, ýatdan, täsirli okaýşy, çeper ýerine ýetiriş ussatlygy boýunça fakultet tapgyrynyň ýeňijisi ýokary okuw mekdebiniň tapgyryna çykarylýar. Ýokary okuw mekdebinde aýratyn tapawutlanan talyp ýokarda beýan edilen görkezijiler boýunça jemleýji tapgyra gatnaşmak üçin seçilip alynýar. Her ýokary okuw mekdebinden jemleýji tapgyra 1 talyp gatnaşmaga hukuk gazanýar.
Bäsleşigiň jemleýji tapgyry aprel aýynyň 26-syna sagat 15:00-da Türkmen döwlet medeniýet institutynyň Mejlisler zalynda geçirilýär. Bäsleşik tamamlanandan soňra bäsleşigiň ýeňijileri bir 1-nji, iki 2-nji, üç 3-nji orunlar boýunça emin agzalary tarapyndan saýlanylýar we köpçülige mälim edilýär. Türkmen döwlet medeniýet institutynyň rektory (rektorlygy) tarapyndan ýeňijilere Hormat hatlary şeýle-de gatnaşyjylara Minnetdarlyk hatlary, sowgatlar gowşurylýar.
Bäsleşikde tapawutlanan çykyşlar köpçülikleýin habar beriş serişdeleri üçin ýazgy ediler we olar baradaky maglumatlar institutyň resmi saýtynda ýerleşdiriler.
Guramaçylyk topary: habarlaşmak üçin tel – 481105, 482117
Maglumatlary ýollamak üçin elektron salgy: tdmi.ylymbolumi@gmail.com
Bäsleşigiň Düzgünnamasy bilen TBM-niň web sahypasynda berlen bildiriş arkaly tanşyp bilersiňiz.
ORIENT
