Aşgabat we Bütindünýä banky hyzmatdaşlygy aýdyňlaşdyrýar: suw meselesi, energetika, ulag
28-nji fewralda Aşgabat şäherinde Türkmenistanyň Daşary işler ministri Raşid Meredow bilen Bütindünýä bankynyň Ýewropa we Merkezi Aziýa boýunça wise-prezidenti Antonella Bassaniniň arasynda duşuşyk geçirildi. Duşuşyga Bütindünýä bankynyň sebitleýin direktorlary we Halkara maliýe korporasiýasynyň wekilleri hem gatnaşdylar.
Ikitaraplaýyn hyzmatdaşlygyň derwaýys meseleleri ara alnyp maslahatlaşyldy, olaryň arasynda energetika we arabaglanyşyk, durnukly ösüşiň esasy faktory hökmünde suw serişdelerini netijeli dolandyrmak ýaly hyzmatdaşlyk gatnaşyklarynyň ileri tutulýan ugurlar kesgitlenildi.
Türkmen tarapy Merkezi Aziýa sebitindäki suw meselelerini çözmek boýunça özüniň esasy üç ýörelgä esaslanýan üýtgewsiz resmi garaýyşlaryny mälim etdi: birinjiden, halkara hukugynyň kadalarynyň berjaý edilmegi, ikinjiden, sebitiň ähli döwletleriň bähbitleriniň nazara alynmagy hem-de üçünjiden, bu işlere halkara guramalarynyň, ilkinji nobatda BMG-niň gatnaşmagy.
Merkezi Aziýanyň serhetüsti derýalarynda gidrotehniki hem-de suw hojalyk desgalarynyň gurluşygynyň ýokary tehnologiki, ekologiýa, tehniki we beýleki halkara ülňüleriniň berk berjaý edilmeginde amala aşyrylmalydygy aýratyn bellenildi.
Mundan başga-da, taraplar ulag we arabaglanyşyk, metan zyňyndylaryny azaltmak hem-de gaýtadan dikeldilýän energiýa çeşmeleri ýaly ugurlar boýunça bilelikdäki işleri jikme-jik ara alyp maslahatlaşdylar.
Raşid Meredow we Antonella Bassani ähli esasy ugurlarda şol sanda, energetika, ulag we arabaglanyşyk, suw serişdelerini netijeli dolandyrmak boýunça hyzmatdaşlygy has-da pugtalandyrmaga ygrarlydyklaryny tassykladylar.
Bir gün öň, 27-nji fewralda Bütindünýä bankynyň wise-prezidenti Türkmenistanyň Maliýe we ykdysadyýet ministri Mämmetguly Astanagulow bilen hem duşuşyp bilelikdäki taslamalary durmuşa geçirmek üçin mundan beýläkki ädimler barada ylalaşdylar.
ORIENT
