“Euronews” Aşgabatda geçiriljek Halkara parahatçylyk we ynanyşmak forumyna çagyryldy
27-nji fewralda Türkmenistanyň Prezidenti Serdar Berdimuhamedow “Euronews” telekompaniýasynyň direktorlar geňeşiniň başlygy Pedro Wargas Dawidi kabul etdi.
Duşuşygyň dowamynda bellenilişi ýaly, häzirki wagtda Türkmenistany dünýäde giňden tanatmak boýunça dürli ýurtlaryň köpçülikleýin habar beriş serişdeleri we halkara media agentlikleri bilen işjeň hyzmatdaşlyk alnyp barylýar. Şunuň bilen baglylykda Ýewropanyň öňdebaryjy media düzümi bolan “Euronews” teleýaýlymy bilen hyzmatdaşlygyň oňyn tejribesi bellenildi.
Hyzmatdaşlygy giňeltmegiň geljegi barada aýdyp. döwlet Baştutany, Türkmenistanyň medeni we taryhy mirasyny dünýä tanatmak, syýahatçylygy ösdürmek ýaly ugurlara ünsi çekdi. Serdar Berdimuhamedow baý milli mirasy we taryhy ýadygärlikleri, täsin tebigy landşaftlary bilen meşhur bolan Türkmenistanyň syýahatçylyk üçin mümkinçiliklerini aýratyn belledi. “Awaza” milli syýahatçylyk zolagy, Köpetdagyň dag etekleri, Garagum sährasy syýahatçylyk babatda uly artykmaçlyklara eýedir.
Şunuň bilen baglylykda, Türkmenistanyň Prezidenti “Euronews” telekompaniýasynyň ýörite gepleşiklerinde Türkmenistan barada degişli wideofilmleriň görkezilýändigini belledi.
Türkmenistanyň başlangyjy boýunça BMG-niň Baş Assambleýasynyň degişli Kararnamasyna laýyklykda, 2025-nji ýyl “Halkara parahatçylyk we ynanyşmak ýyly” diýlip yglan edildi. Şeýle hem şu ýyl biz Türkmenistanyň hemişelik Bitaraplygynyň 30 ýyllygyny giňden belläp geçeris diýip, döwlet Baştutany aýtdy we Pedro Wargas Dawidi 2025-nji ýylyň 12-nji dekabrynda Aşgabatda geçiriljek Halkara parahatçylyk we ynanyşmak forumyna çagyrdy.
Mundan başga-da duşuşykda halkara gün tertibiniň möhüm meseleleri, özara hyzmatdaşlygyň çäklerinde ozal ýerine ýetirilen we geljekde göz öňünde tutulýan taslamalar barada-da pikir alşyldy.
Duşuşygyň ahyrynda Prezident Serdar Berdimuhamedow Türkmenistanyň geljekde-de “Euronews” telekompaniýasy bilen hyzmatdaşlygy ösdürmäge taýýardygyny tassyklady diýip, “Neýtralnyý Türkmenistan” (“Нейтральный Туркменистан”) gazeti habar berýär.
ORIENT
