Nowgorodyň telekeçileri Türkmenistana işewürlik saparyna taýýarlanýarlar
Nowgorodyň eksporty goldaw merkezi sebit telekeçileri üçin Russiýanyň Türkmenistandaky Söwda wekilçiligi bilen wideoaragatnaşyk ulgamy arkaly duşuşyk geçirer. Ol 25-nji fewralda geçiriler we Nowgorodyň telekeçileriniň mart aýynda meýilleşdirilýän Türkmenistana işewürlik saparyna taýýarlyga gönükdirilendir.
Nowgorod sebitiniň hökümetiniň metbugat merkeziniň maglumatlaryna görä, Türkmenistanyň bazaryna girmegiň mümkinçilikleri we we onuň aýratynlyklary, geljegi uly eksport ugurlary, isleg bildirilýän rus harytlary, ýerli kompaniýalar bilen işlemegiň ugurlary we aýratynlyklary barada söhbet ediler.
Nowgorod kärhanalary köp ýyl bäri türkmen kärhanalary bilen hyzmatdaşlyk edýär. Nowgorod sebitiniň Maýa goýum syýasaty ministri Denis Nosaçýewiň sözlerine görä, 2023-nji ýylda eksport 2022-nji ýyl bilen deňeşdirilende 4,7 esse ýokarlandy. Möhüm ösüş agaç we agaç önümleriniň satuwynyň başlamagy bilen baglanyşykly. Sebit şeýle hem efir ýaglary, atyrlar we kosmetika hem-de dürli taýýar önümleri eksport etdi.
“2024-nji ýylyň 9 aýynyň netijelerine görä, Nowgorod sebiti Türkmenistana 1,2 million dollar möçberinde eksport etdi. Önümleriň sanawy üýtgemedi. Mart aýynda Türkmenistana işewürlik sapary amala aşyrylar. Ýakynda geçiriljek wideoaragatnaşyk ulgamy arkaly duşuşyk, eksport merkeziniň wekiliýetine goşulmagy meýilleşdirýän kompaniýalar üçin has möhümdir. Ýöne, umuman aýdanyňda, “Söwda wekili bilen bir sagat” – daşary ýurt we geljegi uly ýerler bilen tanyşmak üçin täsirli guraldyr” – diýip, Nowgorod sebitiniň Maýa goýum syýasaty ministri Denis Nosaçýew mälim etdi.
ORIENT
