Suw astynda 120 gün: Germaniýanyň ýaşaýjysy täze dünýä rekordyny goýdy
25-nji ýanwarda nemes inženeri Rýudiger Koh Panamanyň kenarlarynda ýörite suwasty kapsulada 120 gün ýaşap, suwuň üstüne iň uzak wagt çykmazlyk boýunça täze dünýä rekordyny goýdy. Bu habary France 24 teleýaýlymy habar berdi.
Kapsulanyň meýdany 30 inedördül metr bolup, ol suwuň 11 metr çuňlugynda ýerleşdirilip, ähli häzirki zaman amatlyklary, şol sanda ýatak ýeri, hajathana, telewizor, kompýuter bilen üpjün edilipdir. Internet we türgenleşik enjamlary hem bardy, emma duş otagy ýokdy.
Kapsula elektrik üpjünçiligi üçin Gün batareýalary ulanylypdyr, ýöne ätiýaçlyk generatory hem bolupdyr. Agentligiň maglumatyna görä, Kohyň suwasty kapsulasy suwuň üstündäki desga bilen baglanyşykly bolup, azyk önümleri şol ýerden geçirilipdir. Desgadan, şol sanda lukmanlar, myhmanlar hem peýdalanypdyr.
Koh, suwuň astynda 100 gün ýaşan amerikaly Jozef Dituriniň rekordyny täzeledi. Täze rekord Ginnesiň rekordlar kitabynyň wekilleri tarapyndan resmi taýdan bellige alyndy.
ORIENT
