Türkmenistanda howanyň üýtgemegi boýunça konseptual bellikler bilen tanyşdyryldy
Türkmenistanyň Daşky gurşawy goramak ministrligi bilen hyzmatdaşlykda BMG-niň Ösüş Maksatnamasy hem-de Ýaşyl Klimat Gaznasy tarapyndan durmuşa geçirilýän “Türkmenistanda milli uýgunlaşma meýilnamalaşdyryş işini ösdürmek” atly taslamanyň çäklerinde howanyň üýtgemegi bilen baglanyşykly mowzuklar boýunça konseptual bellikler bilen tanyşdyrmak üçin tegelek stol geçirildi.
Bu bellikler Ýaşyl Klimat Gaznasyna geçiriler.
Tegelek stoluň işine howanyň üýtgemegi boýunça bilermenler, ösüş boýunça hyzmatdaşlar hem-de dürli pudaklaryň wekilleri gatnaşdy.
Gatnaşyjylar iki konseptual bellikler bilen tanyşdylar. Belliklerde olaryň howanyň üýtgemegine uýgunlaşmagyň milli strategiýalaryna hem-de Ýaşyl Klimat Gaznasynyň maýa goýum ugurlaryna laýyk gelşi barada bellenildi. Şeýle-de olarda ileri tutulýan ugurlara, şol sanda klimat hyzmat edişine we uýgunlaşmagyna, howanyň üýtgemeginiň netijelerine ekoulgamlaryň durnuklylygyny ýokarlandyrymak meselelerine hem garaldy.
“Türkmenistanda milli uýgunlaşma meýilnamalaşdyryş işini ösdürmek” taslamasynyň esasy maksady milli uýgunlaşma işini işläp taýýarlamak arkaly uýgunlaşmakda we durnuklylykda Türkmenistanyň mümkinçiliklerini pugtalandyrmakdan ybarat.
ORIENT news
