Türkmen mekdep okuwçylary Matematika, fizika we informatika boýunça Halkara Žautykow olimpiadasyna gatnaşýarlar
Türkmenistanyň mekdep okuwçylary Astanada 13-17-nji ýanwar aralygynda geçirilýän “IzhO 2025” Matematika, fizika we informatika boýunça XXI Halkara Žautykow olimpiadasyna gatnaşýarlar. Bu barada Türkmenistanyň Bilim ministrliginiň saýtynda habar berilýär.
Olimpiada Gazagystan Respublikasynyň Magaryf ministrliginiň “Daryn” Respublikan ylmy-tejribeçilik merkeziniň hem-de Astana şäheriniň akimatynyň ýolbaşçylygynda Respublikanyň fizika-matematika mekdebiniň binýadynda geçirilýär.
Olimpiada 15 ýurtdan 700-e golaý mekdep okuwçylary we 150 ýolbaşçy gatnaşýar. Olaryň arasynda Gazagystan, Gyrgyzystan, Özbegistan, Täjigistan, Russiýa, Belarus, Ermenistan, Azerbaýjan, Türkiýe, Gruziýa, Bolgariýa, Rumyniýa, Serbiýa we Mongoliýa bar.
Žautykow olimpiadasynyň netijeleri boýunça gatnaşyjylara gatnaşandygy baradaky şahadatnamalar we ýadygärlik sowgatlar, ýeňijilere we baýrakly orunlara mynasyp bolan okuwçylara bolsa dürli derejeli diplomlar, şeýle hem altyn, kümüş we bürünç medallar gowşurylar.
Halkara Žautykow olimpiadasy 2005-nji ýyldan başlap, Gazagystanyň Magaryf ministrliginiň ýolbaşçylygynda okuwçylaryň arasynda fizika-matematika ylymlaryny ýaýbaňlandyrmak, dürli ýurtlaryň ýöriteleşdirilen mekdepleriň arasynda dostlukly gatnaşyklary ýola goýmak, tejribe alyşmak, şeýle hem Gazagystanyň bilim we medeniýet derejesini açyp görkezmek maksady bilen geçirilýär.
Şu ýyl olimpiada ilkinji gezek Astanada geçirilýär.
ORIENT news
